केही समयदेखि नेप्से परिसूचक २५ सयदेखि २७ सय बिन्दुको रेन्जमा रहेर साइडवेज मुभमेन्टमा देखिएको छ।
यसले लगानीकर्ता अन्योलमा रहेको र बजारको प्रवृत्ति पनि स्पष्ट हुन नसकेको संकेत गर्छ।
यो प्रवृत्ति अन्त्य हुँदा बजार घट्यो भने थप घट्ने र बढ्यो भने थप बढ्ने हुन्छ। त्यसैले आगामी दिनमा आउने सकारात्मक वा नकारात्मक खबरले नै बजारलाई 'ट्रिगर' गर्ने देखिएको छ।
अहिले पुस सकिएको छ। अब सूचीकृत संस्थाहरूले दोस्रो त्रैमासको वित्तीय विवरण सार्वजनिक गर्न थाल्छन्। त्यसो भए के अब वित्तीय विवरणहरू आउन थालेपछि बजारले स्पष्ट प्रवृत्ति देखाउने सम्भावना छ त?
सेयर विश्लेषक सुवासचन्द्र ढुंगाना भन्छन्, 'सेयर बजारमा लगानी गर्नेहरूले कम्पनीहरूको पहिलो त्रैमासिक विवरण र अहिलेको अवस्थाको विश्लेषण गरेर अब कस्तो वित्तीय विवरण आउन सक्छ भनेर आकलन गरिसकेका छन्। त्यसैले यसको प्रभाव धेरै पर्ने देखिँदैन।'
सामान्यतया दोस्रो त्रैमासको वित्तीय विवरणले बजारलाई प्रभाव पर्ने गरेको देखिँदैन।
अहिले सेयर बजारमा सबभन्दा ठूलो समूह भनेकै बैंक र जलविद्युत समूह हो। यो समयमा यी संस्थाको वित्तीय विवरणमा ठूलो परिवर्तन देखिँदैन।
बैंकहरूले आर्थिक वर्षको अन्त्यमा मात्रै कर्जा असुली बढाउने भएकाले अन्तिम त्रैमासको वित्तीय विवरणको प्रभाव बजारमा धेरै हुन्छ। अन्तिम त्रैमास सकिएपछि नै कम्पनीहरूले कति लाभांश दिन सक्ने भन्ने मोटामोटी यकिन गर्न सकिने भएकाले पनि बजारमा प्रभाव पर्छ।
जलविद्युत कम्पनीहरूको समेत दोस्रो त्रैमासमा आम्दानीमा खासै उचारचढाव देखिँदैन। हिउँदको सिजन भएकाले उत्पादन कम भएको हुन्छ। त्यसैले दोस्रो त्रैमासको प्रतिवेदनको ठूलो प्रभाव नपर्ने विश्लेषक ढुंगाना बताउँछन्।
'घटेको ब्याजदर र अबको वित्तीय विवरणको आकलन लगानीकर्ताहरूले पहिल्यै गरिसकेकाले बजारले त्यही अनुसार प्रतिक्रिया दिइरहेको हो। यही कारण बजार नघटेर माथिल्लो विन्दुमा रहेर साइडवेजमा गएको छ,' ढुंगानाले भने।
त्यसैले अहिले राजनीतिक घटनाक्रम कै वरिपरि रहेर सेयर बजारले प्रतिक्रिया दिइरहेको छ। सेयर ब्रोकर नरेन्द्र सिजापती बताउँछन्।
'अहिले प्रमुख ठूलो दल विभाजन हुने देखिएको छ, यसले निर्वाचन नै सर्ने हो कि भन्ने आशंका छ। त्यसैले माघ ६ गते निर्वाचनका लागि मनोनयन दर्ता हुन थाल्यो भने मात्रै बजारले वृद्धिको बाटो समात्न सक्छ,' उनले भने।
आइतबारको कारोबारमा पनि लगानीकर्ताहरूमा रहेको अन्योलता देखिने सम्भावना रहेको उनी बताउँछन्।
पुस सकिएकाले राष्ट्र बैंकले पनि मौद्रिक नीतिको दोस्रो त्रैमासिक समीक्षा ल्याउने समय भएको छ। यसमा आउने विषयले पनि बजारको दिशा निर्धारण हुनसक्ने ढुंगाना बताउँछन्।
राष्ट्र बैंकले सेयर धितोको ७० प्रतिशतसम्म कर्जा दिन सकिने व्यवस्था गरेको छ। लगानीकर्ताहरू राष्ट्र बैंकले यो सीमा बढाइदिएमा बजारमा सुधार हुने अपेक्षामा छन्।
यसअघि राष्ट्र बैंकले लगानीकर्ताहरूको माग अनुसार एकल ग्राहक सेयर धितो कर्जाको सीमा व्यवस्था खारेज गरेको थियो।
-1746009348.jpg)
