सोमबार ल्याएको नीति तथा कार्यक्रममा नयाँ सरकारले पहिलो पटक सेयर बजारबारे बोले पनि लगानीकर्ताहरू भने आश्वस्त हुन सकेनन्।
विशेषगरेर परम्परागत शैलीमा नीति तथा कार्यक्रममा महत्व दिएको जसरी सेयर बजारका बारेमा चर्चा गरिएको भए पनि बजार सुधारको ठोस विषय नसमेटिएपछि लगानीकर्ताहरू निराश भएका हुन्।
नीति तथा कार्यक्रमले सरकारले सेयर बजारमा संस्थागत लगानीकर्ता बीमा, पेन्सन फण्ड, गैरआवासीय नेपालीको सहभागिता विस्तार गरिने उल्लेख गरेको थियो।
धितोपत्र नियमन, नेप्से तथा क्लियरिङ प्रणालीको पुनर्संरचना गर्ने, पुँजी बजारलाई सुरक्षित र अन्तर्राष्ट्रिय मापदण्ड अनुरूप विकास गर्ने, ऋण बजार, बण्ड बजार, पूर्वाधार बन्ड र जोखिम व्यवस्थापन विकास गरी दीर्घकालीन पुँजी निर्माण गर्ने उल्लेख गरेको थियो।
विगतदेखि नै यी कार्यक्रमको घोषणा गरिने गरिएको र बजार सुधारको लागि यी कार्यक्रम मात्र पर्याप्त नहुने भएपछि लगानीकर्ताहरू आश्वस्त हुन नसकेका हुन्।
मंगलबार नेप्से परिसूचक दोहोरो अंकले घटेको छ।
नेप्से ३९.४४ अंकले घटेर २७४४.४० विन्दुमा बन्द भएको हो।
नेप्से घटेपनि कारोबार रकम भने अघिल्लो दिनको तुलनामा बढेको छ।
सोमबार ४ अर्ब ६१ करोड रूपैयाँको कारोबार भएकोमा यसदिन ४ अर्ब ६६ करोड रूपैयाँको कारोबार भएको छ।
यसदिन ३३८ वटा धितोपत्रको एक करोड ६ लाख ७८ हजार ५५० कित्ता सेयर किनबेच भएको हो।
मंगलबार १३ कम्पनीको सेयर मूल्य बढेको छ भने २५१ वटाको घटेको छ। यस्तै, ५ कम्पनी स्थिर छन्।
यसदिन धौलागिरी लघुवित्तको मूल्य सर्वाधिक १५ प्रतिशतले बढेको छ।
उक्त कम्पनीको प्रतिकित्ता मूल्य एक हजार ४९५ रूपैयाँ पुगेको छ।
यस्तै, एसबिएल डिबेन्चरको मूल्य ५.५३ प्रतिशतले बढेर प्रति डिबेन्चर मूल्य एक हजार २८७ रूपैयाँ ५० पैसा कायम भएको छ।
सर्वाधिक मूल्य घट्नेमा फर्स्ट माइक्रोफाइनान्स रहेको छ।
उक्त कम्पनीको मूल्य १२.४० प्रतिशतले घटेर प्रति कित्ता मूल्य ८०५ रूपैयाँमा झरेको छ
यसैगरी, कुमारी धनवृद्धि योजनाको मूल्य ८.२९ प्रतिशतले घटेर प्रति इकाइ मूल्य ११ रूपैयाँ ५० पैसामा सीमित भएको छ।
मंगलबार नेसनल हाइड्रोपावरको सर्वाधिक कारोबार भएको छ।
उक्त कम्पनीको २८५ रूपैयाँमा १८ करोड ९९ लाख रूपैयाँको कारोबार भएको छ।
यो मूल्य अघिल्लो दिनको तुलनामा ३.८८ प्रतिशत घटेको हो।
सर्वाधिक सेयर खरिद–बिक्री हुने दोस्रो सूचीमा रिलायन्स स्पिनिङ मिल्स रहेको छ। उक्त कम्पनीको तीन हजार ७२९ रूपैयाँमा १८ करोड ९ लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये म्युचुअल फण्ड समूहको परिसूचक बढेको छ भने बाँकी १२ समूहको परिसूचक घट्दा समग्र नेप्से घटेको छ।
यसमध्ये व्यपार समूहको परिसूचक सर्वाधिक २.३३ प्रतिशतले घटेको छ।
