वाईवाई र ग्लोकल प्रा लिले संयुक्त रुपमा आयोजना गरेको ‘वाइवाई ग्लोकल टिन हिरो’का लागि २० उत्कृष्ट प्रतिभाशाली युवा छनौट भएका छन्। २० वर्ष भन्दा कम उमेरका २० किशोर किशोरीहरुको सूची सार्वजनिक भएको हो।
समाज सेवा, बाल अधिकार, कम्प्युटर प्रोग्रामिङ, बिज्ञान, पत्रकारिता, प्रबिधि लगायत क्षेत्रमा कार्यरत भई समाजलाई उत्कृष्ट प्रतिभा देखाएकामध्ये २० जना छनौट भएका हुन्।
ग्लोकल प्रालिका प्रबन्धक निर्देशक आशिष ठाकुरले यो दोस्रो बार्षिक सुची रहेको जानकारी दिए। उनले भने ‘यी किसोर किशोरीहरुले गरेका कामले समाजलाई टेवा पुर्याएको देख्दा खुसी लागेको छ।’ छनौट हुने सबैले बलियो विचारयुक्त टीमको प्रतिनिधित्व गर्ने उनको भनाइ छ।
आंचल अधिकारी काठमाडौँ, आशुतोष सापकोटा बिराटनगर, अभिषेक अधिकारी धरान, अमित खनाल बुटवल, अनिल प्रधान झापा, अनिशा रुचाल धनकुटा, विकल्प ढुंगाना तनहुँ, दीपा अधिकारी पोखरा, दीपशिका घिमिरे मकवानपुरबाट उत्कृष्ट २० मा परेका छन्।
त्यस्तै दिपिषा भुजेल रसुवा, कोविड राज पन्थी लमजुङ, निवेश बराल पोखरा, पलिसा शाक्य काठमाडौँ, प्रसंशा के. सी रुकुम, रिदम साह मोरङ, साहिल कुमार गुप्ता जनकपुर, सौगात तिवारी चितवन, सुदर्शन सुबेदी ओखलढुंगा, स्वर्णिम श्रेष्ठ सिन्धुपाल्चोक र यतिश ओझा झापाबाट उत्कृष्ट २० मा पर्न सफल भएका छन्।
देश भरिबाट आएको ५३० भन्दा बढी आवेदनबाट यी किशोर किशोरीहरु छानिएको ग्लोकलले जनाएको छ। यीमध्येबाट एकलाई वाई वाई ग्लोकल टिन हिरोको छनौट गरी सम्मान गरिनेछ।
