नेपालको रेसम उद्योग पुनःजागरणका लागि राजधानीमा राष्ट्रिय रेसम सम्मेलन आयोजना हुने भएको छ।
ह्याण्डलुम फ्याब्रिक्स मेकर्स अफ नेपाल र रेसम विकास केन्द्रको संयुक्त आयोजनामा पुस २६ गते सम्मेलन हुन लागेको हो।
रेसमलाई रणनीतिक र उच्च मूल्य अभिवृद्धि हुने राष्ट्रिय उद्योगका रूपमा पुनःस्थापित गर्ने उद्देश्यले सम्मेलन आयोजना गरिएको ह्याण्डलुम फ्याब्रिक्सका अध्यक्ष रोशकुमार पोखरेलले जानकारी दिए।
सम्मेलनमा सरकार, निजी क्षेत्र, बैंक तथा वित्तीय संस्था, लगानीकर्ता, कृषक, सहकारी, उद्यमी र निर्यातकर्ताको सहभागिता रहनेछ।
कृषि तथा पशुपन्क्षी विकास मन्त्री डा. मदनप्रसाद परियारले सम्मेलन उद्घाटन गर्ने कार्यक्रम छ।
सम्मेलनमा दिगो रेसम खेती, मूल्य अभिवृद्धि उत्पादन प्रणाली तथा नेपाल रेसम भिजन २०२६–२०३५ सम्बन्धी विषयमा छलफल हुने जनाइएको छ।
करिब २२ हजार हेक्टर क्षेत्रमा किम्बु खेती र एकीकृत रेसम मूल्य श्रृंखला विकास गर्न सके वार्षिक पाँच खर्ब रूपैयाँसम्म आर्थिक मूल्य सिर्जना गर्न सकिने आयोजकको दाबी छ।
-1746009348.jpg)
