मन्त्रीहरूको लगातार दबाबपछि लुम्बिनी प्रदेश सरकारले आर्थिक वर्ष २०८२/८३ को बजेटको आकार बढाउने निश्चितप्रायः भएको छ।
किताब छपाइ लगायत प्राविधिक तयारी नपुगेका कारण दिउँसो ३ बजे भनिएको बजेट प्रस्तुत गर्ने समय दुई घन्टापछि ५ बजेलाई सारिएको छ।
प्रदेशसभा सचिव दुर्लभकुमार पुनका अनुसार तयारी नपुगेको भन्दै मुख्यमन्त्रीको आग्रहमा सभामुख तुलाराम घर्ती मगरले समय सार्न भनेका थिए।
मुख्यमन्त्री चेतनारायण आचार्यको सचिवालयले किताब छाप्ने जस्ता प्राविधिक कारणले समय सार्नुपरेको जानकारी दिएको छ। तर प्रमुख प्रतिपक्षी माओवादी केन्द्रका प्रमुख सचेतक इन्द्रजित थारूले बजेटको विषयमा अन्तिम समयसम्म कुरा मिल्न नसकेको बताए।
'कांग्रेसले बजेटको आकार बढाऊँ भन्ने गरेको तर एमालेले साइजमै राखौं भनेपछि सहमति हुन नसकेको सुनिन्छ,’ उनले भने।
प्रमुख सत्ता साझेदार नेपाली कांग्रेसकी प्रमुख सचेतक जमुना ढकालले आफूलाई पनि ३ बजेलाई भनिएको समय ५ बजेलाई सारिएको भनेर मेसेज आएको बताइन्। उनले पनि अन्तिममा आएर बजेटको आकार बढाउने कुरा सुन्दै आएको बताइन्।
'३२ अर्बबाट बढाएर ३४ र त्यसबाट पनि बढाएर झन्डै ४० अर्ब हाराहारीको बजेट ल्याउने भन्ने कुरा सुन्नमा आएको छ,' उनले भनिन्।
नेकपा एमालेका प्रमुख सचेतक तुलसी चौधरीले जहाँसम्मको अनुमति हुन्छ, त्यही आकारको बजेट ल्याउने बताए।
'३२ अर्बको बजेट ल्याउने भनिए पनि ३८ अर्बको ल्याउन मिल्ने भए किन सानो बजेट ल्याउने भन्ने कुरा हो,' चौधरीले भने, 'त्यसमा अरू खासै समस्या छैन, बजेट बेलुकी आउँछ।'
लुम्बिनी प्रदेशका एक जना मन्त्रीले पनि गए राति अबेरसम्म बसेर बजेटको आकार टुंग्याएको बताए। 'हामीले राति अबेरसम्म बसेर बजेट टुंग्याइसकेका छौं,' उनले भने, 'अब बजेटको आकार केही बढ्ने छ।'
नेपाली कांग्रेसबाट प्रतिनिधित्व गर्ने ती मन्त्रीका अनुसार अर्थ मन्त्रालयले यसअघि मन्त्रीहरूलाई पठाएको बजेटको आकार झन्डै ३२ अर्बको थियो। अब गत आर्थिक वर्षकै हाराहारी झन्डै ३९ अर्बको बजेट आउन लागेको उनले बताए।
-1756794700.JPG)
-1746009348.jpg)
