प्रधानमन्त्रीको आजदेखि सुरु हुने भारत भ्रमणका लागि तयार पारिएको प्रतिनिधिमण्डलमा भारततर्फ निर्यात हुने प्रमुख वस्तुका उत्पादक संघका एक जना प्रतिनिधि पनि समावेश नगरिएको भन्दै निजी क्षेत्रले प्रश्न उठाएको छ।
नेपालबाट भारतमा निर्यात हुँदै आएका प्रमुख वस्तुका उत्पादक तथा निर्यातकर्तालाई भ्रमण टोलीमा स्थान नदिइएको भन्दै निजी क्षेत्रले सरकारको आर्थिक कूटनीति र निर्यात प्रवर्द्धनप्रतिको प्राथमिकतामाथि प्रश्न उठाएको हो।
नेपाल प्लाइउड उत्पादक संघका अध्यक्ष होमनाथ घिमिरेले भारतमा निर्यात गर्ने वस्तुगत संघका प्रतिनिधि भ्रमण टोलीमा एक जना पनि नरहेको बताए।
‘भारतमा निर्यात गर्ने वस्तुगत संघका प्रतिनिधि एक जना पनि छैनन्। गार्मेन्ट र कार्पेटका केही उद्योगी व्यवसायी परेका छन्, तर उनीहरूको भारतमा निर्यात हुँदैन,’ घिमिरेले भने।
नेपाल उद्योग वाणिज्य महासंघ र निर्यात व्यवसायी महासंघ नेपाललगायत संस्थाले निर्यातमुखी उद्योग तथा व्यवसायीको प्रतिनिधित्व सुनिश्चित गर्न सिफारिस गरे पनि ती क्षेत्रका प्रतिनिधि भ्रमण टोलीमा अटाउन नसकेको उनीहरूको गुनासो छ।
भारत नेपालको सबैभन्दा ठूलो व्यापारिक साझेदारमध्ये एक हो।
नेपालबाट भारतलगायत अन्तर्राष्ट्रिय बजारमा निर्यात हुँदै आएका मूल्य अभिवृद्धियुक्त वस्तुमा फलाम तथा स्टिल, प्लाइवुड, सिमेन्ट, भेनियर, चिया, अलैँची, अदुवा र रुद्राक्षलगायत उत्पादन छन्।
यी वस्तुको निर्यातमा संलग्न उत्पादक संघका प्रतिनिधिलाई भ्रमण टोलीमा समावेश नगरिएको गुनासो छ।
भारतसँगको व्यापार विस्तार, नेपाली उत्पादनको बजार पहुँच वृद्धि, गैरभन्सार अवरोध न्यूनीकरण, द्विपक्षीय व्यापार सन्तुलन सुधार तथा नयाँ निर्यात सम्भावना खोज्ने दृष्टिले प्रधानमन्त्रीको भ्रमण महत्वपूर्ण अवसर भएपनि समस्या भोगेका व्यवसायिको सहभागित नभएको उनीहरूको गुनासो छ।