नेपालको सार्वजनिक ऋणभार २८ खर्ब ५९ अर्ब नाघेको छ।
सार्वजनिक ऋण व्यवस्थापन कार्यालयका अनुसार चालु आर्थिक वर्षको सात महिनाको अवधि (साउनदेखि माघसम्म) मा यो आकडा पुगेको हो।
गत असार मसान्तसम्म सार्वजनिक ऋण २६ खर्ब ७४ अर्ब ४ करोड रूपैयाँ थियो।
माघ मसान्तसम्म कुल ऋणमध्ये आन्तरिक ऋण १३ खर्ब ४९ अर्ब र बाह्य ऋण १५ खर्ब ९ अर्ब रूपैयाँ रहेको छ।
नेपालको कुल गार्हस्थ उत्पादन (जिडिपी) को आधारमा सार्वजनिक ऋण ४६.८१ प्रतिशत पुगेको छ।
यसमा आन्तरिक ऋण २२.०९ प्रतिशत र बाह्य ऋण २४.७ प्रतिशत रहेको छ।
नेपाली मुद्रा कमजोर हुँदा बाह्य ऋणमाथि ठूलो भार थपिएको छ। नेपाली रूपैयाँको तुलनामा समग्र ऋण भएको मुद्रा महॅंगो भएकोले यस्तो दायित्व मात्रै ९२ अर्ब ९६ करोड बढेको छ।
अर्थात करिब ९३ अर्ब रूपैयाँ विनिमयदर घाटा देखिएको छ।
सरकारले ७ महिनामा २ अर्ब ५५ करोड रूपैयाँ नयाँ ऋण उठाएको छ। यसमध्ये २ खर्ब १७ अर्ब आन्तरिक ऋण र ३७ अर्ब ८१ करोड बाह्य ऋण प्राप्त भएको छ।
चालु आर्थिक वर्षमा सरकारले ५ खर्ब ९५ अर्ब ६६ करोड रूपैयाँ ऋण उठाउने लक्ष्य राखेको छ।
सोही अवधिमा सरकारले एक खर्ब ६३ अर्ब रूपैयाँ ऋण भुक्तानी पनि गरेको छ।
यसमा आन्तरिक ऋणतर्फ एक खर्ब ३६ अर्ब र बाह्य ऋणतर्फ २६ अर्ब ७६ करोड सावाँ भुक्तानी गरिएको छ।
यसो हुँदा वास्तविक थपिएको ऋण ९१ अर्ब रूपैयाँ भए पनि विनिमयदर घाटको कारण भार एक खर्ब ८४ अर्ब रूपैयाँले बढेको हो।
-1746009348.jpg)
