निर्माणाधिन सिॅंचाइ आयोजनाको भौतिक तथा वित्तीय प्रगति सुस्त देखिएको छ।
आर्थिक सर्वेक्षण २०८२/८३ अनुसार सिक्टा सिँचाइ आयोजनाको भौतिक प्रगति २०८२ असारसम्म ४४.२ प्रतिशत रहेकोमा फागुनसम्म बढेर ४७.५ प्रतिशत पुगेको छ।
अर्थात् आठ महिनामा ३.३ प्रतिशत प्रगति थपिएको छ।
आयोजनाबाट हालसम्म २२ हजार ५ सय हेक्टर जमिनमा सिँचाइ सुविधा पुगेको छ।
रानी जमरा कुलरिया सिँचाइ आयोजनाको भौतिक प्रगति फागुनसम्म ७४.८ प्रतिशत पुगेको छ।
आयोजनामा मूल नहर, गेट जडान र विद्युत गृह निर्माणको काम अघि बढेको सरकारको भनाइ छ।
भेरी–बबई डाइभर्सन बहुउद्देश्यीय आयोजनाको प्रगति फागुनसम्म ७० प्रतिशत पुगेको छ।
आयोजनाले बाँके र बर्दियाका ५१ हजार हेक्टर जमिनमा बाह्रै महिना सिँचाइ सुविधा पुर्याउने लक्ष्य राखेको छ।
महाकाली सिँचाइ आयोजनाको भौतिक प्रगति फागुनसम्म २७.९८ प्रतिशत पुगेको छ।
चालु आवको फागुनसम्म १ किलोमिटर मूल नहर, २ किलोमिटर शाखा नहर र ४ वटा नहर साइफन निर्माण सम्पन्न भएको छ।
सुनकोशी–मरिन डाइभर्सन बहुउद्देश्यीय आयोजनाको प्रगति फागुनसम्म ३७.२ प्रतिशत पुगेको छ।
आयोजनाअन्तर्गत १३.३ किलोमिटर सुरुङ निर्माण सम्पन्न भएको सरकारले जनाएको छ।
त्यस्तै, बबई सिँचाइ आयोजनाको भौतिक प्रगति फागुनसम्म ७८.७४ प्रतिशत पुगेको छ।
आयोजनाबाट हालसम्म २८ हजार हेक्टर जमिनमा सिँचाइ सुविधा विस्तार भएको छ।
