एसियाली पूर्वाधार लगानी बैंकको वार्षिक बैठकमा सहभागी भएर अर्थमन्त्री डा. स्वर्णिम वाग्ले फर्किएका छन्।
कतारको दोहामा भएको बैठकमा नेपाल बैंकको उपसभापतिमा निर्वाचित भएको छ।
बैठकका क्रममा वाग्लेले नेपालको पूर्वाधार विकासका लागि लगानी विस्तार, सहुलियतपूर्ण वित्त र निजी पुँजी परिचालनबारे धारणा राखेका थिए।
बैंकको गभर्नर परिषद्ले वाग्लेलाई सन् २०२६–२७ का लागि उपसभापति निर्वाचित गरेको हो। क्षेत्रीय सदस्य राष्ट्रहरूमध्येबाट नेपाल पहिलोपटक बैंकको उपसभापति निर्वाचित भएको हो।
बैठकमा वाग्लेले पूर्वाधारमा लगानी कम विकसित मुलुकको आर्थिक वृद्धिको महत्वपूर्ण आधार भएको बताए।
सडक, विद्युत, सञ्चार तथा सूचना प्रविधिलगायत क्षेत्रमा लगानी बढाउनुपर्ने उनको भनाइ थियो।
नेपालजस्ता मुलुकको आवश्यकताअनुसार बैंकको लगानीलाई थप सहुलियतपूर्ण बनाउनुपर्नेमा उनले जोड दिए।
स्वदेशी तथा विदेशी निजी पुँजी आकर्षित हुने गरी वित्तीय स्रोत उपलब्ध गराउनुपर्ने धारणा पनि उनले राखे।
बैठकका क्रममा वाग्लेले बैंकका अध्यक्षसँग भेटवार्ता गरे।
कतार, भारत, बंगलादेश, आर्मेनिया र जर्जियाका अर्थमन्त्रीसँग पनि उनले द्विपक्षीय भेट गरे।
ती भेटमा आर्थिक सहकार्य, लगानी विस्तार तथा नेपालको प्राकृतिक विपत्तिपछिको पुनर्निर्माणमा सहयोगबारे छलफल भएको थियो।
नेपाल बैंकको उपसभापति निर्वाचित भएपछि पूर्वाधार विकासका लागि बैंकबाट लगानी विस्तार गर्न थप अवसर मिल्ने सरकारको अपेक्षा छ।
यसबाट प्रविधि हस्तान्तरण र सदस्य मुलुकसँगको सहकार्य बढाउन पनि सहयोग पुग्ने विश्वास गरिएको छ।
वाग्ले असोज १० गते बैंकको वार्षिक बैठकमा सहभागी हुन कतार गएका थिए।
