के तपाइँ सामाजिक सुरक्षा कोषको योगदानकर्ता हुनुहुन्छ?
यदि, हुनुहुन्छ र १२ महिना योगदान गरिसक्नु भयो भने अब मोबाइलबाटै तपाइँको खातामा ऋण आइपुग्छ।
कोषले विशेष सापटी योजना अन्तर्गत उपलब्ध गराउने सहुलियत ऋणका लागि मोबाइलबाटै आवेदन दिन सकिन्छ।
जसका लागि एपको लोन रिक्वेस्ट अप्सनमा जानुहोस्।
प्रोसिड बटन थिचेर प्रक्रिया अगाडि बढाउनु होस्। त्यसपछि तपाइँको अवकाश योजनामा जम्मा भएको रकमको कति प्रतिशत रकम ऋण लिने त्यो सुविधा छान्न सकिन्छ।
उक्त रकमको न्यूनतम १० प्रतिशतदेखि अधिकतम ८० प्रतिशतसम्म ऋण लिन सकिन्छ।
कति अवधिका लागि लिने भनेर अवधिसमेत छान्न सकिन्छ। न्यूनतम १ वर्षदेखि अधिकतम पाँच वर्षसम्मका लागि यस्तो सापटी लिन सकिन्छ। त्यसपछि ऋण लिन चाहेको कारण खुलाएर आवेदन दिन सकिन्छ।
आवेदन दिएपछि भोलिपल्टै तपाइँको खातामै ऋण जम्मा हुन्छ।
कोषका अनुसार हाल यसरी पाइने ऋणको ब्याजदर ५.२ प्रतिशत तोकिएको छ।
यसअघि यस्तो सापटी लिनका लागि योगदानकर्ताले नियमित ३६ महिना(तीन वर्ष) योगदान गर्नुपर्ने प्रावधान थियो।
लिएको ऋण कसरी तिर्ने?
यसरी लिएको ऋण समेत मोबाइलबाटै तिर्न सकिन्छ। ऋण कति अवधिका लागि लिएको हो सो अवधिभित्र एकमुष्ट वा किस्ता किस्तामा तिर्न सकिन्छ।
ऋण तिर्नका लागि 'लोन रिपे' बटन थिच्नुहोस्। त्यहाँ तपाइँले लिएको विशेष सापटी रकमको अवस्था देखिन्छ। ब्याजदर कति थपियो भन्ने समेत त्यहिँ हेर्न सकिन्छ।
न्यूनतम पाँच प्रतिशतदेखि शत प्रतिशतसम्म लोन एकै पटक तिर्न सकिन्छ। इसेवा, कनेक्ट आइपिएस र खल्तीबाट तिर्न सकिन्छ।
-1746009348.jpg)
