रूपन्देहीको बुटवल उप-महानगरपालिका वडा नम्बर ६ मा सञ्चालित दुई वटा रेस्टुरेन्टबाट तीन जना बाल श्रमिकको उद्धार गरिएको छ।
श्रम तथा व्यवसायजन्य विभागका अनुसार श्रम तथा रोजगार कार्यालयको समन्वयमा साउन ७ गते गरिएको संयुक्त अनुगमनका क्रममा राजु रेस्टुरेन्ट र सुशान्त रेस्टुरेन्टमा बालश्रम प्रयोग भइरहेको भेटिएको हो।
जिल्ला प्रशासन कार्यालय रूपन्देही, इलाका प्रहरी कार्यालय बुटवल, बुटवल उपमहानगरपालिका र सिविन नेपाल बालहेल्पलाइन १०९८ को संयुक्त टोलीले उक्त स्थानमा निरीक्षण गरेको थियो।
निरीक्षणका क्रममा राजु रेस्टुरेन्टमा एक जना र सुशान्त रेस्टुरेन्टमा दुई जना बालक श्रमिकका रूपमा कार्यरत फेला परेको थियो।
उद्धार गरिएका ती बालकहरूलाई तत्काल संरक्षणका लागि सिविन नेपालको आपतकालीन वासगृहमा पठाइएको छ।
बालश्रम प्रयोग गरेको कसुरमा टोलीले दुवै रेस्टुरेन्टलाई प्रति रेस्टुरेन्ट ५० हजार रूपैयाँका दरले कुल एक लाख रूपैयाँ जरिवाना गर्ने निर्णय गरेको छ।
यसका साथै, श्रम ऐन अनुसार उनीहरूले काम गरेको अवधिको आधारमा बाँकी पारिश्रमिक र क्षतिपूर्ति बापतको रकम भुक्तानी समेत गराइएको छ।
राजु रेस्टुरेन्टमा कार्यरत बालकका लागि तीन लाख ८४ हजार ३४९ र सुशान्त रेस्टुरेन्टमा कार्यरत दुई बालकका लागि क्रमशः एक लाख ८७ हजार ४८६ र ४१ हजार ५३६ क्षतिपूर्ति बापतको रकम भुक्तानी गराइएको छ।
रेस्टुरेन्ट सञ्चालकहरूलाई अब उप्रान्त बालश्रम प्रयोग नगर्न चेतावनी दिइएको विभागले जनाएको छ।
उद्धार गरिएका बालकहरूलाई आवश्यक प्रक्रिया पूरा गरी हाल निजका आफन्तको जिम्मा लगाइ सकिएको उल्लेख छ।
