भायानेट कम्युनिकेसनले सन् २०२४ को एसियन टेलिकम अवार्डमा 'ब्रोडब्यान्ड टेलिकम कम्पनी अफ द इयर' र 'टेक्नोलोजी इनोभेसन अफ द इयर–नेपाल' अवार्ड जितेको छ।
एक्सजिएस टेक्नोलोजीमा आधारित नेपालको पहिलो मल्टि–गिग इन्टरनेट बजारमा ल्याएर नयाँ टेक्नोलोजीमा परिचित गराउने र ग्राहकमा यसको उल्लेख्य प्रभाव ल्याउन सफल भएको हुनाले कम्पनीलाई यी प्रतिष्ठित पुरस्कारहरूबाट सम्मानित गरिएको कम्पनीको भनाइ छ।
अवार्ड समारोह फेब्रुअरी २९ मा सिंगापुरमा आयोजना भएको थियो।
उक्त अवार्डको लागि भायानेट नेपालका अन्य इन्टरनेट प्रदायक र टेलिकम कम्पनीहरूसँग मनोनयनमा परेको थियो।
विभिन्न निर्णायकहरूको प्रक्रियागत निर्णय र छलफलको आधारमा सम्मानित प्यानलले भायानेटलाई विजेताको रूपमा चयन गरेको हो।
कम्पनीले यस विधामा नेपालमा पहिलो पटक यो प्रतिष्ठित अवार्ड जितेको हो।
एसियाली टेलिकम अवार्ड एसियन मोबाइल न्यूजबाट सञ्चालन हुँदै आएको छ। अवार्ड कार्यक्रमले एशियाका अग्रणी टेलिकम र ब्रोडब्यान्ड कम्पनीहरूको उत्कृष्ट उपलब्धी र पहलहरूलाई मान्यता दिँदै आएको बताइएको छ।
भायानेट कम्युनिकेसनकी सिइओ सेवा पाठक बोहराले भनिन् 'भायानेट सधैं ग्राहकको आवश्यकता अनुरुप नविनतम टेक्नोलोजीको प्रयोग गर्नेमा अग्रपंक्तिमा रहँदै आएको छ र यी पुरस्कारहरूले हाम्रो टिम र कम्पनीको अथक प्रयास र ग्राहक प्रतीको प्रतिबद्धतालाई थप उ।र्जा प्रदान गर्छ।'
एक्सजिएस फाइबर टेक्नोलोजी, १० गिगाबिट्स प्रति सेकेन्ड (जिबिपिएस) सम्मको समान गतिमा डेटा स्थानान्तरण प्रदान गर्ने क्षमताको साथ बजारमा ल्याएसँगै स्थानीय व्यापार परिदृश्यमा यसको प्रभाव निकै राम्रो देखिएको कम्पनीले बताएको छ।
कम्पनीका अनुसार यसले उद्यमहरूलाई अतुलनीय दक्षता र विश्वसनीयताका साथ डिजिटल अर्थतन्त्रको आवश्यक मागहरू पूरा गर्न सक्षम बनाउँछ।
