सञ्चार तथा सूचना प्रविधि मन्त्री पृथ्वीसुब्बा गुरुङले माघभित्र फाइभजी परीक्षण सुरु हुने बताएका छन्।
चलचित्र विकास बोर्डको २५औं वार्षिकोत्सव तथा रजत जयन्ती समारोहमा उनले यस्तो जानकारी दिएका हुन्।
उनले कृत्रिम बुद्धिमत्ता (एआई) प्रवर्द्धनका लागि पाँचौं पुस्ताको दूरसञ्चार प्रविधि (फाइभजी) आवश्यक भएकोले काठमाडौं उपत्यका र पोखरा उपत्यकाबाट माघ महिनाभित्र फाइभजी परीक्षण सुरु गरिने स्पष्ट पारे।
उनले भने, ‘एआईको प्रयोगलाई प्रभावकारी बनाउन फाइभजी नेटवर्क अपरिहार्य छ। त्यसैले हामी यो वर्ष फाइभजीको काम सुरु गरेर अर्को वर्षभित्र देशभर विस्तार गर्ने लक्ष्यमा छौँ।’
उनले डिजिटल नेपाल फ्रेमवर्क कार्यान्वयनको अन्तिम चरणमा रहेको समेत बताए। मन्त्रिपरिषद्बबाट यो फ्रेमवर्क चाँडै पारित भएर लागू हुने समेत उनले बताए।
मन्त्री गुरुङले डिजिटल नेपाल नीतिअन्तर्गत पर्यटन, शिक्षा, सुशासन, विपद् व्यवस्थापनसहित आठ क्षेत्रमा प्रविधिको प्रयोग विस्तार गर्न सरकार तयारी अवस्थामा रहेको उल्लेख गरे।
मन्त्री गुरुङले सातै प्रदेशमा आइटी डाटा सेन्टर र एआई केन्द्र स्थापना गर्ने तयारी सरकारको रहेको समेत बताए।
-1746009348.jpg)
