टिकटकले प्रयोगकर्ताको डिजिटल स्वास्थ्य र सुरक्षित अनलाइन बानीलाई सशक्त बनाउन ‘टाइम एन्ड वेल–बिइङ’ नामक नयाँ सुविधा सुरु गरेको छ।
यसमार्फत प्रयोगकर्ताले आफ्नो स्क्रिन–टाइम नियन्त्रण, मानसिक सन्तुलन र स्वस्थ डिजिटल बानी विकास गर्न मद्दत गर्ने विभिन्न उपकरणहरू प्रयोग गर्न सक्नेछन्।
सुरक्षा र कम्युनिटी गाइडलाइन्सलाई प्राथमिकता दिँदै आएको टिकटकले पछिल्लो समय उन्नत ‘फ्यामिली पेयरिङ’ फिचर र किशोर–किशोरीको प्रयोग अस्थायी रूपमा रोक्ने क्षमता भएको ‘टाइम अवे’ फिचर जस्ता धेरै उपयोगी सुविधाहरू थप्दै आएको छ।
यस वर्ष, टिकटकले राति आराम गर्न मद्दत होस् भनेर किशोर–किशोरीका लागि ‘मेडिटेसन फिचर’ सुरु गरेको छ।
नयाँ सुविधाले पुरानो ‘स्क्रिन–टाइम म्यानेजमेन्ट’ पेजलाई प्रतिस्थापन गर्दै अफर्मेशनल जर्नल, शान्त ध्वनि सुन्न मिल्ने साउन्ड जेनरेटर, तथा श्वास–प्रश्वास अभ्यास जस्ता उपकरणहरू उपलब्ध गराएको छ।
अफर्मेशन कार्ड डाउनलोड वा सेयर गर्न सकिने, वर्षा र छालजस्ता ध्वनि सुन्ने तथा ध्यान केन्द्रित गर्ने अभ्यासले प्रयोगकर्तालाई विश्राम र मानसिक स्वच्छता कायम गर्न सहयोग पुर्याउने कम्पनीको दाबी छ।
यससँगै टिकटकले चार ‘वेल–बिइङ मिसन’ पनि लागू गरेको छ, जसमा आठ हप्ते स्लीप आवर्स मिसन, दैनिक स्क्रिन–टाइम ब्याज, साप्ताहिक रिपोर्ट जाँच तथा साथीहरूलाई आमन्त्रित गरी संयुक्त रूपमा सचेत बानी विकास गर्ने सुविधा समावेश छन्।
यी मिसन पूरा गर्दा प्रयोगकर्ताले डिजिटल ब्याज प्राप्त गर्छन्, जसले सकारात्मक प्रयोग प्रवृत्ति प्रोत्साहित गर्छ।
कम्पनीका अनुसार यी सुविधाहरू डिजिटल वेलनेस ल्याब, आन्तरिक अध्ययन तथा युवा परिषद्को सुझावका आधारमा विकास गरिएका हुन्।
टिकटकले समय र स्वास्थ्यसम्बन्धी उपकरणहरूलाई प्लेटफर्ममा अझ सहज रूपमा एकीकृत गर्दै लैजाने योजना पनि सार्वजनिक गरेको छ।
-1746009348.jpg)
