अस्ट्रेलियामा सामाजिक सञ्जालका विभिन्न प्ल्याटफर्महरुले बालबालिकाको खाता हटाउन थालेको छ।
त्यहाँको सरकारले मंगलबार बेलुका १६ वर्ष मुनिका बालबालिकाहरूलाई सामाजिक सञ्जालका १० वटा प्ल्याटफर्महरुमा प्रतिबन्ध लगाउने निर्णय गरेको थियो।
सरकारले कानुन नै बनाएर बालबालिकाहरूलाई सामाजिक सञ्जालको पहुँचबाट निषेध गर्ने निर्णय गरेको थियो।
सरकारको उक्त निर्णयपछि बुधबार बिहानैदेखि फेसबुक, इन्स्टाग्राम, टिकटक, युट्युब, एक्स, थ्रेड, स्न्यापच्याट, रेडिट, ट्वीच र किकजस्ता प्ल्याटफर्महरूमा १६ वर्षमुनिका बालबालिकहरूको खाता बन्द गरिएको हो।
मंगलबार साँझसम्म सामाजिक सञ्जाल चलाइरहेका बालबालिकाहरुले बुधबार बिहान उठ्दा आफ्नो खाता बन्द भएको सूचना पाएका थिए।
प्रधानमन्त्री एनथोनी अल्बानेजले यो दिनलाई अस्ट्रेलियाका बालबालिका अभिभावकहरूले गर्व गर्ने दिन भनेका छन्।
'यो दिन हो जब अस्ट्रेलियाली परिवारहरूले यी ठूलो प्रविधि कम्पनीहरूबाट शक्ति फिर्ता लिँदैछन्। बालबालिकाले बालबालिकै रूपमा बस्ने अधिकार र अभिभावकहरूले मानसिक शान्ति पाउने अधिकार सुनिश्चित गर्दैछन्,' उनले भने।
नयाँ कानूनअनुसार प्लेटफर्महरूले बालबालिकाहरूलाई सामाजिक सञ्जाल प्ल्याटफर्म प्रयोगमा रोक लगाइएको उचित कदम लिएको प्रमाण देखाउनुपर्नेछ।
जसमा १६ वर्षमुनिका प्रयोगकर्ताको खाता निष्क्रिय पार्ने र नयाँ खाता खोल्न रोक्ने व्यवस्था गर्नुपर्नेछ।
त्यसो नभए सम्बन्धित प्ल्याटफर्मलाई झन्डे ५ करोड अस्ट्रेलियन डलर जरिवाना हुनेछ।
स्न्यापच्याटले १६ वर्षमुनिका सबै खाताहरू बन्द गरिएको जनाइसकेको छ।
युट्युमा पनि त्यस्ता खाता स्वतः साइन आउट भएको भनेर अमेरिकी टेलिभिजन नेटवर्कले जनाएको छ।
टिकटकले १६ वर्षमुनिका सबै खाताहरू डिसेबल गर्ने जनाएको छ।
मेटाले इन्स्टाग्राम, फेसबुक र थ्रेड्सले १६ वर्षमुनिका प्रयोगकर्ताका खाता हटाउन सुरु भएको जनाएको छ।
रेडिट र एक्सले पनि सरकारको निर्णयमा सहमति जनाएको छ। यद्यपि एक्सले अभिव्यक्ति स्वतन्त्रताको हनन भएको भनेर विरोध पनि जनाएको छ।
त्यसका बाबजुद डिस्कर्ड, गिटहब, गुगल क्लासरूम, लेगो प्ले, मेसेन्जर, रोबलोक्स, स्टिम, ह्वाट्स एप र युट्युब किड्स भने खुला छन्।
बालबालिकाहरूले वैकल्पिक प्लेटफर्म खोजिरहेका छन्।
योप र लेमन एटजस्ता प्लेटफर्महरूले अस्ट्रेलियामा नयाँ प्रयोगकर्ता आकर्षित गरिरहेका छन्। यद्यपि इसेफ्टी कमिसनरले ती प्लेटफर्महरूलाई पनि नियमको दायरामा ल्याउने चेतावनी दिइसकेकी छन्।
-1746009348.jpg)
