नेपाल टेलिकमले भ्यालु एडेड सर्भिसेस (भास) सेवा प्रदायकमार्फत प्रवाह हुने आपत्तिजनक प्रकृतिका एसएमएस सन्देशप्रति गम्भीर ध्यानाकर्षण भएको जनाएको छ।
टेलिकमका अनुसार भास सेवा प्रदायकमार्फत सेवाग्राहीलाई आवश्यकताअनुसार विभिन्न प्रकारका एसएमएस सन्देश पठाउने व्यवस्था रहेको छ।
तर यस प्रक्रियामा नेपाल टेलिकमले कुनै पनि सेवाग्राहीको व्यक्तिगत मोबाइल नम्बर वा अन्य व्यक्तिगत विवरण भास सेवा प्रदायकलाई उपलब्ध नगराउँदै आएको स्पष्ट पारेको छ।
हाल केही भास सेवा प्रदायकमार्फत स्वीकृत व्यवसायभन्दा फरक, जातीय, वर्गीय, धार्मिक, साम्प्रदायिक वा राजनीतिक सद्भावमा खलल पुर्याउने किसिमका आपत्तिजनक सन्देश नेपाल टेलिकमका मोबाइल नम्बरहरूमा प्रवाह भइरहेको र यस विषयमा सेवाग्राही तथा राज्यका जिम्मेवार निकायहरूबाट समेत गुनासो प्राप्त भएको टेलिकमले जनाएको छ।
यस सन्दर्भमा सम्बन्धित भास सेवा प्रदायकलाई यस्ता सन्देश प्रवाह नगर्न सचेत गराइएको र आगामी दिनमा समेत यस प्रकारका सन्देश सर्वसाधारणको मोबाइल नम्बरमा नपठाइने सुनिश्चित गर्न निर्देशन दिइएको टेलिकमले बताएको छ।
यदि यस्ता कार्य पुनः दोहोरिएमा सम्झौताका प्रावधानअनुसार भास सेवा प्रदायकसँगको सम्झौता नै रद्द गर्न सकिने चेतावनी टेलिकमले दिएको छ।
-1746009348.jpg)
