अन्तर्राष्ट्रिय बजारमा सुनको मूल्यमा १२ वर्षयताकै ठूलो गिरावट आएको समयमा नेपालमा सार्वजनिक बिदा परेको कारण यहाँको मूल्य तत्काल घट्न पाएन।
बिदा नपरेको भए मंगलबारको दर अनुसार एकै दिन सुनको भाउ करिब १८ हजार रूपैयाँले घट्ने नेपाल सुनचाँदी व्यवसायी महासंघका वरिष्ठ उपाध्यक्ष धर्म सुन्दर बज्राचार्यले बताएका छन्।
'त्यो समय सार्वजनिक बिदा हुने थिएन भने भाउ तोक्दा एकै दिन सुनको मूल्य करिब १८ हजार रूपैयाँले घटेको हुने थियो,' बज्राचार्यले भने।
महासंघले गत कात्तिक ३ गते तोकेको प्रतितोला दुई लाख ५३ हजार पाँच सय रूपैयाँकै दर यथावत् राखेको छ।
त्यसयता लगातार सार्वजनिक बिदा परेकाले नयाँ मूल्य तोकिएको छैन। नेपालमा सार्वजनिक बिदाका दिन सुनको मूल्य तोकिँदैन। त्यसैले अब आइतबार मात्र नयाँ मूल्य तोकिनेछ।
अन्तर्राष्ट्रिय बजारमा सोमबार प्रतिऔंस ४,३८१ डलरसम्म पुगेको सुन मंगलबार ६.३ प्रतिशतले घटेर ४,०८२ डलरमा झरेको द फाइनान्सियल टाइम्सले जनाएको छ। यो सन् २०१३ अप्रिलपछि एकै दिनमा आएको सबभन्दा ठूलो गिरावट हो।
अब आइतबार तोकिने नयाँ मूल्य कति हुने भन्ने अनुमान गर्न कठिन भए पनि सुनको दर घट्ने संकेत बलियो छ।
अन्तर्राष्ट्रिय बजारमा बुधबार प्रतिऔंस सुनको मूल्य ४,०९७ डलरमा पुगेको थियो भने बिहीबार ४,०२६ डलरमा कारोबार भएको गोल्ड प्राइस डटकम ले उल्लेख गरेको छ। मूल्य एक प्रतिशतभन्दा बढीले घटेको हो।
शुक्रबार ४,०५६ डलरमा कारोबार भइरहेको छ।
यी आधारमा आइतबार नेपालमा तोकिने नयाँ मूल्य अहिलेको तुलनामा १५ देखि १८ हजार रूपैयाँले घट्न सक्ने अनुमान गरिएको छ।
-1746009348.jpg)
