सन् २०२१ मा 'च्याटजिपिटी' बनाउने अमेरिकी आर्टिफिसियल इन्टेलिजेन्स (एआई) कम्पनी ओपनएआईभित्र असहमति चुलिँदै थियो।
एआई प्रविधि कति छिटो विकास गर्ने? यसलाई कति शक्तिशाली बनाउने? अनि मानिसको नियन्त्रणभन्दा बाहिर जान सक्ने प्रविधिलाई कसरी सुरक्षित राख्ने?
यिनै प्रश्नलाई लिएर कम्पनीका केही वरिष्ठ अनुसन्धानकर्ता र अधिकारीहरूको नेतृत्वसँग मतभेद भयो।
यही मतभेदका कारण अन्ततः ७ जनाले ओपनएआई छाडे।
र, नयाँ कम्पनी खोले — एन्थ्रोपिक।
त्यस बेला एन्थ्रोपिकसँग आजको जस्तो विशाल व्यवसाय थिएन। न लाखौं प्रयोगकर्ताले प्रयोग गर्ने 'क्लड' च्याटबट थियो। न त विश्वका ठूला प्रविधि कम्पनीहरूबाट अर्बौं डलर लगानी नै आएको थियो।
उनीहरूको साझा उद्देश्य थियो — शक्तिशाली एआई विकास गर्ने, तर त्यसलाई मानिसका लागि सुरक्षित र नियन्त्रणयोग्य बनाउने।
पाँच वर्षपछि तिनै सात जना विश्व प्रविधि उद्योगको केन्द्रमा आइपुगेका छन्।
एन्थ्रोपिक अहिले इतिहासकै सबभन्दा ठूलो सार्वजनिक सेयर निष्कासन (आइपिओ) गर्ने तयारीमा छ। कम्पनीको मूल्यांकन २० खर्ब अमेरिकी डलरसम्म पुग्न सक्ने अनुमान गरिएको छ।
यसले कम्पनीका सातै संस्थापकको सम्पत्तिमा ठूलो वृद्धि हुन सक्छ। उनीहरू प्रविधि क्षेत्रकै धनी अर्बपतिको सूचीमा पर्न सक्छन्। यद्यपि उनीहरूको व्यक्तिगत सेयर स्वामित्व र अन्तिम आइपिओ मूल्यांकनका आधारमा मात्रै वास्तविक सम्पत्ति निर्धारण हुनेछ।
अमेरिकी अखबार 'द न्यूयोर्क टाइम्स' ले एन्थ्रोपिकका सात संस्थापकको व्यक्तिगत जीवन, शिक्षा, करिअर र कम्पनी निर्माणमा उनीहरूको भूमिकाबारे विस्तृत प्रोफाइल प्रकाशित गरेको छ।
यी सात जनाको पृष्ठभूमि रोचक छ। कोही भौतिकशास्त्री हुन् भने कोही साहित्यका विद्यार्थी। कोही पत्रकार, कोही कम्प्युटर वैज्ञानिक। एक जनाले त विश्वविद्यालयको परम्परागत अध्ययनभन्दा स्वतन्त्र अनुसन्धान रोजेका थिए।
तीमध्ये दुई जना त साख्खै दाजुबहिनी समेत हुन्।
डारियो अमोदेई : क्यान्सर उपचारमा अनुसन्धान गर्दागर्दै एआई कम्पनीका प्रमुख बनेका वैज्ञानिक
एन्थ्रोपिकका प्रमुख कार्यकारी अधिकृत डारियो अमोदेई ४३ वर्षका छन्।
उनको बाल्यकाल अमेरिकाको सान फ्रान्सिस्कोस्थित मिसन डिस्ट्रिक्टमा बित्यो। उनी आफ्नी बहिनी डानिएलासँग हुर्किए।
उनीहरूका बुबा छालाका सामग्री बनाउने शिल्पकार थिए। आमाले सान फ्रान्सिस्को र बर्कलीका पुस्तकालयहरूको मर्मत तथा पुनर्निर्माण परियोजना व्यवस्थापन गर्थिन्।
डारियो २० वर्षको हुँदा उनका बुबाको निधन भयो।
डारियोले सान फ्रान्सिस्कोको लोवेल हाई स्कुलमा अध्ययन गरे। त्यसपछि क्यालिफोर्निया इन्स्टिच्युट अफ टेक्नोलोजीमा भौतिकशास्त्र पढ्न थाले। स्नातक अध्ययन पूरा गर्न उनी स्ट्यानफोर्ड विश्वविद्यालय पुगे।
उनले प्रिन्सटन विश्वविद्यालयबाट जैविक भौतिकशास्त्र र कम्प्युटेसनल न्युरोसाइन्समा विद्यावारिधि गरे।
उनको अनुसन्धानको सुरूआती विषय एआई च्याटबट थिएन। उनी मानव शरीर र रोगसँग सम्बन्धित वैज्ञानिक समस्यामा रूचि राख्थे।
विद्यावारिधिपछि उनी स्ट्यानफोर्ड विश्वविद्यालयको मेडिकल स्कुलमा अनुसन्धान गर्न पुगे। त्यहाँ उनको ध्यान क्यान्सरको पहिचान र उपचारमा सुधार ल्याउने विषयमा थियो।
फेब्रुअरीमा न्यूयोर्क टाइम्ससँग कुरा गर्दै उनले त्यस बेला आफू क्यान्सरको उपचार खोज्ने अनुसन्धानमा केन्द्रित रहेको बताएका थिए।
पछि उनको अनुसन्धानको बाटो फेरियो।
सन् २०१४ मा उनी चिनियाँ इन्टरनेट कम्पनी बाइडुमा अनुसन्धानकर्ता बने। त्यसपछि गुगलमा काम गरे।
सन् २०१६ मा उनी ओपनएआई पुगे।
त्यहाँ उनले अनुसन्धान उपाध्यक्ष लगायत विभिन्न जिम्मेवारी सम्हाले। जिपिटी–२ र जिपिटी–३ जस्ता ठूला भाषा मोडेल विकासमा नेतृत्वदायी भूमिका निर्वाह गरे।
तर एआई विकासको दिशा र सुरक्षाबारे मतभेद बढ्दै गएपछि सन् २०२१ मा उनले ओपनएआई छाडे।
त्यसपछि बहिनी डानिएला र अन्य पाँच सहकर्मीसँग मिलेर एन्थ्रोपिक स्थापना गरे।
आज डारियो एआई प्रविधिको विकाससँगै त्यसका जोखिमबारे सार्वजनिक बहस गर्ने प्रमुख व्यक्तिमध्ये एक हुन्।
उनले एआईलाई खुला रूपमा सबैका लागि उपलब्ध गराउने कि कडा नियन्त्रणमा राख्ने भन्ने विषयमा अन्य प्रविधि कम्पनीका नेताहरूसँग मतभेद राख्दै आएका छन्।
अमेरिकी रक्षामन्त्री पिट हेगसेथसँग पनि उनको विवाद भएको छ। खासगरी मानिसको प्रत्यक्ष नियन्त्रणबिना घातक आक्रमण गर्न सक्ने स्वचालित हतियार र नागरिकमाथि व्यापक निगरानीका लागि एआई प्रयोग गर्ने विषयमा।
न्यूयोर्क टाइम्सका अनुसार सेप्टेम्बरमा प्रकाशित करिब ३,८०० शब्दको निबन्धमा उनले विश्वव्यापी रूपमा एआई विकासको गति सुस्त बनाउन आह्वान गरेका थिए।
त्यसको केही सातापछि उनले अमेरिकी राष्ट्रपति डोनाल्ड ट्रम्पसँग निजी रात्रिभोज गरे। अन्य एआई कम्पनीका प्रमुखहरूसँगै राष्ट्रपतिले आयोजना गरेको दिवाभोजमा पनि सहभागी भए।
एआईको तीव्र विकासले निम्त्याउन सक्ने खतराबारे चेतावनी दिने डारियो अहिले त्यही प्रविधिको विकासमा विश्वकै ठूलो लगानी जुटाउने तयारीमा रहेको कम्पनीको नेतृत्व गरिरहेका छन्।
डानिएला अमोदेई : साहित्य पढेकी बहिनी, जसले दाजुसँग मिलेर एआई साम्राज्य बनाइन्
डारियोकी बहिनी डानिएला अमोदेई ३९ वर्षकी छन्।
उनी एन्थ्रोपिककी अध्यक्ष हुन्। कम्पनीको दैनिक व्यवसाय सञ्चालन, व्यवस्थापन र वरिष्ठ नेतृत्व टोलीको जिम्मेवारी उनकै काँधमा छ।
दाजु डारियोको पृष्ठभूमि भौतिकशास्त्र र वैज्ञानिक अनुसन्धान हो भने डानिएलाले साहित्य अध्ययन गरेकी थिइन्। उनले युनिभर्सिटी अफ क्यालिफोर्नियाबाट अंग्रेजी साहित्यमा स्नातक गरेकी हुन्।
विश्वविद्यालयपछि उनी अन्तर्राष्ट्रिय विकासका क्षेत्रमा काम गर्न थालिन्। त्यसै क्रममा अमेरिकाको मेरिल्यान्ड र अफ्रिकी देश युगान्डामा काम गरिन्।
सन् २०१२ मा उनी पेन्सिलभेनियाबाट अमेरिकी संसदको तल्लो सदनमा उम्मेदवारी दिएका डेमोक्र्याट नेता म्याट कार्टराइटको चुनावी अभियानमा सरिक भइन्।
कार्टराइट निर्वाचित भएपछि वासिङ्टनस्थित उनको कार्यालयमा सञ्चारसम्बन्धी जिम्मेवारी सम्हालिन्।
सन् २०१३ मा उनी सान फ्रान्सिस्को फर्किइन्। त्यहाँ भुक्तानी प्रविधि कम्पनी स्ट्राइपमा कर्मचारी भर्नासम्बन्धी काम सुरू गरिन्। पछि कम्पनीको जोखिम व्यवस्थापन विभागको नेतृत्वसम्म पुगिन्।
सन् २०१८ मा उनी ओपनएआईमा इन्जिनियरिङ व्यवस्थापकका रूपमा प्रवेश गरिन्। पछि मानव संशाधनसम्बन्धी उपाध्यक्ष र सन् २०२० मा सुरक्षा तथा नीतिसम्बन्धी उपाध्यक्ष बनिन्।
त्यहीँ काम गर्दा उनले दाजु डारियोसँग मिलेर एआई विकासका जोखिम र कम्पनीको दिशाबारे गम्भीर छलफल गर्न थालिन्।
सन् २०२१ मा दुवैले ओपनएआई छाडेर एन्थ्रोपिक स्थापना गरे।
दाजुबहिनीले एउटै कम्पनीको नेतृत्व गर्दा असहमति कसरी समाधान गर्छन्?
गत मेमा स्ट्यानफोर्ड ग्र्याजुएट स्कुल अफ बिजनेसमा डानिएलाले यसबारे रोचक प्रसंग सुनाएकी थिइन्।
उनले भनेकी थिइन्, 'डारियो र म झन्डै ४० वर्षदेखि झगडा गर्दै र त्यसलाई मिलाउँदै आएका छौं। उनी मेरा दाजु हुन् र सानोमा म उनका खेलौना चोर्थेँ। त्यसैले हामीलाई आपसी मतभेद कसरी समाधान गर्ने भन्ने थाहा छ।'
उनीहरू वयस्क भइसकेपछि पनि एक समय सान फ्रान्सिस्कोको एउटै सामूहिक घरमा बसेका थिए।
डानिएलाका पति होल्डेन कार्नोफ्स्की एक परोपकार अभियानका प्रारम्भिक अगुवामध्ये एक हुन्। यो अभियानले दान तथा परोपकारबाट समाजमा सम्भव भएसम्म बढी सकारात्मक प्रभाव पार्ने उद्देश्य राख्छ।
आज एन्थ्रोपिकमा डारियोले प्रविधि र दीर्घकालीन रणनीतिको नेतृत्व गर्छन् भने डानिएलाले त्यसलाई व्यवसायका रूपमा सञ्चालन गर्ने प्रमुख जिम्मेवारी सम्हाल्छिन्।
जेरेड काप्लान : विज्ञान कथाले भौतिकशास्त्रतर्फ तानिएका अनुसन्धानकर्ता
एन्थ्रोपिकका प्रमुख वैज्ञानिक अधिकृत जेरेड काप्लान ४२ वर्षका छन्।
उनको बाल्यकालमा विज्ञानप्रति आकर्षण बढ्नुको एउटा रोचक कारण थियो — उनकी आमा विज्ञान कथा लेखिका थिइन्।
गत वर्ष एउटा स्टार्टअप कार्यक्रममा उनले आमाको लेखनका कारण आफूलाई भौतिकशास्त्रमा रूचि जागेको बताएका थिए।
उनले सिकागो नजिकैको इलिनोइस म्याथम्याटिक्स एन्ड साइन्स एकेडेमीमा अध्ययन गरे।
त्यसपछि स्ट्यानफोर्ड विश्वविद्यालयमा भौतिकशास्त्र र गणित पढे। हार्वर्ड विश्वविद्यालयबाट भौतिकशास्त्रमा विद्यावारिधि गरे।
काप्लान र डारियो अमोदेईको चिनजान एन्थ्रोपिक स्थापना हुनुभन्दा धेरै पहिले भएको थियो।
सन् २००० दशकको मध्यतिर उनीहरू दुवैले हर्ट्ज फेलोसिप पाएका थिए। त्यही फेलोसिपको एउटा कार्यक्रममा जाँदा उनीहरूले एउटै गाडीमा यात्रा गरेका थिए।
गत वर्ष हर्ट्ज फाउन्डेसनको कार्यक्रममा काप्लानले त्यो यात्रा सम्झँदै भनेका थिए, 'हामीले यात्राको अधिकांश समय परोपकारबारे कुरा गरेका थियौं।'
काप्लानले पछि एसएलएसी नेसनल एक्सेलेरेटर ल्याबोरेटरीमा अनुसन्धान गरे। जोन्स हप्किन्स विश्वविद्यालयमा सहप्राध्यापक बने।
सन् २०१९ मा उनी ओपनएआईमा अनुसन्धान परामर्शदाताका रूपमा प्रवेश गरे।
एन्थ्रोपिकमा उनको सबभन्दा महत्त्वपूर्ण योगदानमध्ये एक 'कन्स्टिच्युसनल एआई' को विकास हो। यसमा एआई मोडेललाई केही लिखित सिद्धान्त र नियमका आधारमा तालिम दिइन्छ, ताकि एआईले दिने उत्तर ती सिद्धान्त अनुसार सुरक्षित र जिम्मेवार बनून्।
यो भनेको एआईले के भन्न मिल्छ र के भन्न हुँदैन भन्ने विषयमा हरेक पटक मानिसले प्रत्यक्ष निर्देशन दिनुपर्ने आवश्यकता घटाउने प्रयास हो।
एन्थ्रोपिकको क्लडलाई अन्य एआई मोडेलभन्दा फरक बनाउने प्रमुख अनुसन्धानमध्ये यो पनि एक हो।
साम म्याकक्यान्डलिस : कम्पनी खोल्ने इच्छा थिएन, तर जिम्मेवारी ठाने
एन्थ्रोपिकका प्रमुख आर्किटेक्ट साम म्याकक्यान्डलिस ३६ वर्षका छन्।
उनको जिम्मेवारी विशाल एआई मोडेललाई कसरी तालिम दिने र त्यसका लागि आवश्यक प्राविधिक प्रणाली कसरी निर्माण गर्ने भन्ने हो।
अक्टोबरमा प्रमुख आर्किटेक्ट बन्नुअघि उनी कम्पनीका प्रमुख प्रविधि अधिकृत थिए। उनले ब्रान्डाइस विश्वविद्यालयमा गणित र भौतिकशास्त्र पढे। भौतिकशास्त्रमा स्नातकोत्तर गरे।
त्यसपछि स्ट्यानफोर्ड विश्वविद्यालयबाट सैद्धान्तिक तथा गणितीय भौतिकशास्त्रमा विद्यावारिधि गरे।
उनले बोस्टन विश्वविद्यालयमा पोस्टडक्टोरल अनुसन्धान पनि गरेका थिए।
सन् २०१८ मा उनी ओपनएआईमा सुरक्षा अनुसन्धान फेलोका रूपमा प्रवेश गरे।
त्यहाँ उनले जिपिटी–३ र कोडेक्स जस्ता एआई प्रणाली निर्माण गर्ने प्राविधिक टोलीमा काम गरे।
सन् २०२१ मा अन्य सहकर्मीसँग मिलेर एन्थ्रोपिक स्थापना गर्ने निर्णय गर्दा उनीहरू सबैको मनमा व्यवसायी बन्ने सपना थिएन।
सन् २०२४ मा एन्थ्रोपिकले युट्युबमा सार्वजनिक गरेको सात संस्थापकको सामूहिक छलफलमा म्याकक्यान्डलिसले भनेका थिए, 'हामीमध्ये कसैलाई पनि कम्पनी स्थापना गर्ने इच्छा थिएन। तर हामीले यसलाई आफ्नो जिम्मेवारी ठान्यौं।'
यो भनाइले एन्थ्रोपिक स्थापना पछाडिको उनीहरूको सोचलाई प्रतिबिम्बित गर्छ।
उनीहरूले शक्तिशाली एआईको विकास र सुरक्षामा काम गर्ने छुट्टै संस्था आवश्यक ठानेका थिए।
पाँच वर्षपछि त्यही संस्था विश्वकै ठूलो आइपिओ गर्ने तयारीमा पुगेको छ।
टम ब्राउन : एआईलाई चाहिने विशाल कम्प्युटिङ पूर्वाधारका जिम्मेवार
एन्थ्रोपिकका प्रमुख कम्प्युटिङ अधिकृत टम ब्राउन ३९ वर्षका छन्।
उनको काम एआई मोडेल निर्माण गर्ने वैज्ञानिक अनुसन्धानभन्दा केही फरक छ।
एआईलाई शक्तिशाली बनाउन विशाल कम्प्युटिङ क्षमता आवश्यक पर्छ। हजारौं अत्याधुनिक चिप, डेटा सेन्टर, विद्युत र ती सबैलाई सञ्चालन गर्ने प्राविधिक प्रणाली चाहिन्छ।
ब्राउन यही पूर्वाधारको नेतृत्व गर्छन्।
उनी सान फ्रान्सिस्कोमै हुर्किएका हुन्। उनले म्यासाचुसेट्स इन्स्टिच्युट अफ टेक्नोलोजी (एमआइटी) बाट इन्जिनियरिङमा स्नातक र स्नातकोत्तर गरे। उनको अध्ययन कम्प्युटर विज्ञानसँग सम्बन्धित थियो।
केही स्टार्टअपमा काम गर्नुका साथै उनले आफ्नै व्यवसाय पनि सुरू गरेका थिए।
सन् २०१६ मा उनी ओपनएआईमा प्रवेश गरे। त्यति बेला कम्पनीमा काम गर्ने पहिलो २० कर्मचारीमध्ये उनी एक थिए।
केही समयपछि उनी गुगल गए। तर सन् २०१८ मा ओपनएआई फर्किएर अनुसन्धान इन्जिनियरिङको नेतृत्व गर्न थाले।
ब्राउन एक समय सान फ्रान्सिस्कोको 'आर्काइभ' नामक सामूहिक घरमा बस्थे।
त्यहाँ एन्थ्रोपिककी दार्शनिक अनुसन्धानकर्ता अमान्डा आस्केल र कम्पनीको प्रयोगात्मक उत्पादन टोलीको सहनेतृत्व गर्ने बेन्जामिन मान पनि बस्थे।
एन्थ्रोपिकमा ब्राउन डेटा सेन्टर विस्तारका सार्वजनिक समर्थक हुन्।
न्यूयोर्क टाइम्सका अनुसार अमेरिकी सरकारले कम्पनीका अत्याधुनिक एआई मोडेल फेबल–५ र मिथोस–५ मा विदेशी नागरिकको पहुँच रोक्न निर्देशन दिएपछि सरकारसँग भएको वार्तामा पनि उनले प्रमुख भूमिका खेलेका थिए।
गत सेप्टेम्बरमा उनी डारियो अमोदेईसँगै ह्वाइट हाउसमा राष्ट्रपति ट्रम्प र अन्य एआई सञ्चालकहरूसँग भएको छलफलमा सहभागी थिए।
एन्थ्रोपिकले भविष्यमा ठूलो पुँजी जुटाउन खोज्नुको एउटा प्रमुख कारण कम्प्युटिङ पूर्वाधारको यही विशाल आवश्यकता हो।
ज्याक क्लार्क : प्रविधि पत्रकारबाट एआई कम्पनीका संस्थापक
एन्थ्रोपिकका संस्थापक ज्याक क्लार्क ३८ वर्षका छन्।
अन्य संस्थापकहरू प्रायः भौतिकशास्त्र, गणित र कम्प्युटर विज्ञानका अनुसन्धानकर्ता हुन्। तर क्लार्कको पृष्ठभूमि पत्रकारिता हो।
उनी बेलायतको ब्राइटनमा हुर्किएका हुन्। उनले भार्नडिन स्कुल र भार्नडिन कलेजमा अध्ययन गरे। त्यसपछि युनिभर्सिटी अफ इस्ट एङ्लियामा अंग्रेजी साहित्य पढे।
विश्वविद्यालयमा पढ्दादेखि नै उनी कलेज पत्रिकाका लागि लेख्थे। पछि उनी प्रविधि पत्रकार बने।
उनले द रजिस्टर र ब्लुमबर्ग जस्ता सञ्चारमाध्यममा काम गरे।
पत्रकारिताकै क्रममा सन् २०१५ मा एउटा सम्मेलनमा उनको डारियो अमोदेईसँग भेट भएको थियो।
त्यो भेटले उनको करिअरको दिशा बदलिदियो।
सन् २०१६ मा उनी ओपनएआईमा रणनीति र सञ्चारसम्बन्धी काम गर्न प्रवेश गरे। पछि कम्पनीका नीति निर्देशक बने।
एन्थ्रोपिक स्थापना भएपछि पनि उनी नीति निर्माण र सरकारसँगको सम्बन्धमा सक्रिय रहे।
मार्चमा उनले कम्पनीभित्र नयाँ जिम्मेवारी पाए — सार्वजनिक हित विभाग प्रमुख।
यो भूमिकामा उनले 'एन्थ्रोपिक इन्स्टिच्युट' नामक आन्तरिक अनुसन्धान संस्था सुरू गरेका छन्। यसले एआईको विकासबाट समाज, अर्थतन्त्र र सुरक्षामा पर्ने प्रभावबारे अध्ययन गर्छ।
क्लार्क अहिले पनि नियमित रूपमा लेख्छन्।
उनको 'इम्पोर्ट एआई' नामक साप्ताहिक न्युजलेटर छ, जसमा एआई प्रविधिका नयाँ विकास र तिनका प्रभावबारे चर्चा हुन्छ।
एआईका प्राविधिक विषयलाई आम मानिस र नीति निर्मातासम्म पुर्याउने उनको अनुभव एन्थ्रोपिकका लागि महत्त्वपूर्ण बनेको छ।
क्रिस्टोफर ओला : १९ वर्षमै एक लाख डलर पाएर स्वतन्त्र अनुसन्धान थालेका वैज्ञानिक
एन्थ्रोपिकका सात संस्थापकमध्ये सबभन्दा कान्छा हुन् क्रिस्टोफर ओला।
उनी ३४ वर्षका छन्।
उनको बाल्यकाल क्यानडाको टोरन्टोमा बित्यो। उनले त्यहाँको निजी एबेलार्ड स्कुलमा अध्ययन गरे।
१९ वर्षको उमेरमा उनले एउटा असाधारण अवसर पाए।
प्रविधि लगानीकर्ता पिटर थिएलसँग सम्बन्धित थिएल फाउन्डेसनले उनलाई फेलोसिपका लागि छनोट गर्यो। त्यस अन्तर्गत उनले स्वतन्त्र रूपमा मेसिन लर्निङ र न्युरल नेटवर्कबारे अनुसन्धान गर्न एक लाख अमेरिकी डलर प्राप्त गरे।
उनले थ्रीडी प्रिन्टिङसम्बन्धी स्टार्टअपमा काम गरे। गुगलमा इन्टर्नसिप गरे र सन् २०१५ मा पूर्णकालीन कर्मचारी बने।
गुगलमा काम गर्दा उनी डारियो अमोदेईको छेउमै बस्थे। त्यहीँ टम ब्राउनसँग पनि काम गरे।
सन् २०१६ मा उनले 'डिस्टिल' नामक मेसिन लर्निङसम्बन्धी अनुसन्धान जर्नल स्थापना गर्न सहयोग गरे।
सन् २०१८ मा उनी ओपनएआई पुगे।
त्यहाँ उनको अनुसन्धानको मुख्य विषय थियो — एआईले निर्णय कसरी गर्छ भनेर बुझ्ने।
आधुनिक एआई मोडेल अत्यन्त जटिल हुन्छन्। तिनले कुनै प्रश्नको उत्तर कसरी तयार गरे वा कुनै निष्कर्षमा किन पुगे भन्ने कुरा अनुसन्धानकर्तालाई समेत स्पष्ट नहुन सक्छ।
ओलाको अनुसन्धान यही रहस्य बुझ्ने प्रयासमा केन्द्रित छ।
यसलाई 'इन्टरप्रेटेबिलिटी रिसर्च' भनिन्छ।
एन्थ्रोपिकमा उनी यही अनुसन्धान टोलीको नेतृत्व गर्छन्।
उनको उद्देश्य एआईको कृत्रिम न्युरल नेटवर्कभित्र हुने जटिल गणनालाई मानिसले बुझ्न सक्ने प्रक्रियामा व्याख्या गर्नु हो।
न्यूयोर्क टाइम्सका अनुसार गत मेमा उनी भ्याटिकन पुगेका थिए।
त्यहाँ पोप लियो चौधौंले एआईको विकाससँग सम्बन्धित जोखिमबाट मानव समाजलाई संरक्षण गर्नुपर्ने विषय समेटिएको धार्मिक दस्तावेज सार्वजनिक गर्ने कार्यक्रममा उनी सहभागी भए।
त्यस कार्यक्रममा सात मिनेट लामो सम्बोधन गर्दै ओलाले एआई विकास गर्ने कम्पनीहरूको कामलाई संसारले गम्भीरतापूर्वक जाँच्नुपर्ने बताएका थिए।
उनले एआई कम्पनीहरूले गल्ती गरिरहेको अवस्थामा उनीहरूलाई त्यसबारे स्पष्ट रूपमा बताउन संसारलाई आग्रह गरे।
***
यो पनि पढ्नुहोस्:
