राजश्व अनुसन्धान विभागले भन्सार छली तथा नक्कली बिल बनाएर राजश्व छली गर्नेहरु विरुद्ध ७७ करोड ४ लाख विगो दाबी गर्दै मुद्दा दायर गरेको छ।
विभागले विभिन्न फर्महरु विरुद्ध विगो तथा सजाया माग गर्दै उच्च अदालत पाटनमा मुद्दा दायर गरेको हो।
झुटा तथा नक्कली बिल बनाएर मूल्यअभिबृद्धि कर छली गरेको आरोपमा न्यू कोइराला ब्रदर्स इन्टरप्राईजेज विरुद्ध विभागले मुद्दा दायर गरेको छ। यो फर्म विरुद्ध एक करोड सत्तरी लाख विगो दाबी गरिएको छ। एकातिर वस्तु खरिद नगरेपनि भ्याट बिल लिएको र अर्कोतिर वस्तु खरिद नगरेपनि खरिद गरेको भनी देखाएर आयकर छली गरेको विभागले दाबी गरेको छ। आयकर र मूल्यअभिबृद्धि कर छली गरेको अनुसन्धानबाट पुष्टि भएको विभागले जानकारी दिएको छ।
त्यस्तै समर ट्रेडर्स विरुद्ध विगभाले ४ करोड ५८ लाख विगो असुल उपर र जरिवाना एवं कैद सजायको माग विभागले गरेको छ। समर ट्रेडर्सले आयात गरेका सबै बस्तु बिक्री गरेको देखाउन नसकेको, आयात गरिएको भन्दा बढी बिक्री गरेको भनी देखाएको र दर्ता गर्ने र कारोबार गर्ने व्यक्ती फरक भएको विभागले अनुसन्धानबाट पत्ता लागेको जानकारी दिएको छ। समर ट्रेडर्सले काठमाडौंमा ठेगाना देखाएपनि भन्सार विन्दुबाटै कारोबार गरेको पाइएको विभागको दाबी छ। यो फर्मका प्रोपाइटर गौतम सर्राफ र कारोबार गर्ने राधाकृष्ण प्रसाद तुराह विरुद्ध विभागले मुद्दा दायर गरेको छ।
विभागले सबैभन्दा ठूलो अंकको विगो कायम गरी अवैध मोबाइलको व्यापार गरी राजश्व छली गरेको आरोपमा काँठमाडौं बसोबास गर्ने मयुर मालाकार विरुद्ध मुद्दा दायर गरेको छ। मालाकार र उनका सहयोगी निकेश शाक्य विरुद्ध ४३ करोड १८ लाख ९५ हजार विगो कायम गर्दै जरिबाना तथा सजायाको माग गर्दै विभागले मुद्दा दायर गरेको छ।
विभागको अध्ययनअनुसार मालाकारले २०६६ सालदेखि भन्सार चोरी गर्दै मोबाइलको अवैध कारोबार गरेको पाइएको छ। मालाकारले लामो समयदेखि भन्सार छली गर्दै मोबाइल विदेशबाट ल्याएर कारोबार गरेको पाइएको विभागले जानकारी दिएको छ। भन्सारदेखि कर कार्यालयसमेत कतै पनि दर्ता नभइ कुनै पनि कम्पनी दर्ता नगरी व्यक्तीगत खाताबाटै मालाकारले कारोबार गरेको पाइएको हो।
त्यस्तै विदेशबाट खाद्यनन्न ल्याएर नेपालमा बिक्री वितरण गर्दै आएको जिमी ग्रुपले १८ करोड ३३ लाख कर छली गरेको भन्दै विभागले मुद्दा दायर गरेको छ। नाफा घटाउनका लागि वस्तु नै खरिद नगरी झुटा मूल्य अभिबृद्धि कर देखाएर ग्रुपले आयकर छली गरेको र अर्कोतिर बीलको दुरुपयोग गरेको भन्दै बिलअनुसारको मूल्यअभिबृद्धि कर पनि छली गरेको भन्दै विभागले मुद्दा दायर गरेको हो।
त्यस्तै नाफा घटाएर आयकर छली गर्न वस्तु नै खरिद नगरी कागजी बिल पेस गरेर कर छली गरेको अभियोगमा ललितपुरको न्यू क्रियसन इम्पेक्स प्रालि,बंगलामुखी ट्रेड एण्ड सप्लाई र काठमाडौंको बिएस ट्रेड इन्टरनेशनलले कर छली गरेको भन्दै ९ करोड २३ लाख विगो असुल उपर गरी जरिवाना एवं कैद सजायसमेत माग गर्दै विभागले मुद्दा दायर गरेको हो।