सुदूरपश्चिम सरकारले आर्थिक वर्ष २०८२/०८३ को मंसिर महिना मसान्तको तुलना गर्दा झन्डै तीन करोड जति कम राजस्व संकलन गरेको छ।
बितेको आर्थिक वर्ष २०८१/०८२ मा कुल राजस्व संकलनको लक्ष्य एक अर्ब ६० करोड ७ लाख १५ हजार रुपैयाँ थियो। चालु आर्थिक वर्ष २०८२/०८३ मा एक अर्ब ६५ करोड रुपैयाँ निर्धारण गरिएको छ।
मंसिरसम्मको प्राप्ति प्रतिशत अघिल्लो वर्ष ३०.३४ प्रतिशत रहेकोमा यो चालु वर्षमा २७ .४२ प्रतिशतमा सीमित देखिएको छ।
तथ्यांकअनुसार आर्थिक वर्ष २०८१ /०८२ को मंसिरमा ४८ करोड ७६ लाख २३ हजार रुपैयाँ राजस्व संकलन भएको थियो। तर, यो चालु आर्थिक वर्ष २०८२ /८३ को मंसिरसम्म ४५ करोड २४ लाख ८४ हजार रुपैयाँ मात्र संकलन भएको छ।
प्रदेश सरकारले चालु आर्थिक वर्षमा बजेट खर्चका लागि कुल ३३ अर्ब ४७ करोड ६० लाख ४८ हजार रुपैयाँ विनियोजन गरेकोमा हालसम्म जम्मा ८.४४ प्रतिशत मात्रै खर्च भएको छ। चालु खर्चतर्फ १३ अर्ब ६३ करोड ५५ लाख ४२ हजार रुपैयाँ बजेट रहेकोमा १६.५१ प्रतिशत मात्रै खर्च भएको छ।
त्यस्तै, पुँजीगततर्फ १९ अर्ब ८३ करोड पाँच लाख ६ हजार रुपैयाँ बजेट विनियोजन गरिकोमा खर्च २.८९ प्रतिशत मात्रै रहेको छ।
भौतिक पूर्वाधार विकास मन्त्रालयको कुल बजेट १५ अर्ब ३२ करोड १७ लाख ४१ हजार रुपैयाँ रहेकोमा कुल खर्च ४.१४ प्रतिशत रहेको छ। सामाजिक विकास मन्त्रालयको सात अर्ब पाँच करोड ५२ लाख ९७ हजार रुपैयाँ बजेटमध्ये कुल खर्च १३.०६ प्रतिशत रहेको छ। भूमि व्यवस्था, कृषि तथा सहकारी मन्त्रालयको कुल बजेट तीन अर्ब २७ करोड ८१ लाख ५३ हजार रुपैयाँ रहेकामा खर्च ६. ७६ प्रतिशत मात्रै भएको छ।
त्यस्तै उद्योग, पर्यटन, वन तथा वातावरण मन्त्रालयको कुल खर्च प्रतिशत ११.८१ प्रतिशत मात्रै भएको छ।
मुख्यमन्त्री तथा मन्त्रीपरिषद्को कार्यालयको कुल खर्च जम्मा १२.०८ प्रतिशत मात्रै छ भने आर्थिक मामिला मन्त्रालयको कुल खर्च १८.९९ प्रतिशत र आन्तरिक मामिला तथा कानून मन्त्रालयको कुल खर्च ४.४ प्रतिशत रहेको छ।
त्यस्तै प्रदेश व्यवस्थापिकाको कुल खर्च २७.८४ प्रतिशत र प्रदेश योजना आयोगको १८.९७ प्रतिशत खर्च भएको छ। स्थानीय तहतर्फ तीन अर्ब ४२ करोड ७७ लाख रुपैयाँ बजेट रहेकामा १७.०१ प्रतिशत मात्रै खर्च भएको छ।
आर्थिक मामिला मन्त्रालयको प्रतिवेदन अनुसार यो बर्ष मंसिर मसान्त सवारी साधन करतर्फ केही बढी राजस्व संकलन भएको छ। मंसिर मसान्तसम्म २६ करोड ११ लाख ८९ हजार रुपैयाँ संकलन भएको छ।
गत आर्थिक वर्षको मंसिर मसान्तसम्म २५ करोड ९७ लाख ०९ हजार रुपैयाँ राजस्व संकलन भएको थियो।
सवारी साधन करतर्फ १४ लाख ८० हजार बढी राजस्व संकलन भएको तथ्यांकले देखाएको छ।
चालु आर्थिक वर्षको यो अवधिमा सुदूरपश्चिममा घरजग्गा रजिष्ट्रेसन दस्तुर कर भने घटेको देखिएको छ।
गत वर्ष मंसिरसम्म १५ करोड १७ लाख ७० हजार रुपैयाँ रजिष्ट्रेसन कर संकलन भएकोमा चालु वर्ष जम्मा ८ करोड २० लाख ७ हजार रुपैयाँ मात्रै संकलन भएको छ।
तर, मनोरञ्जन करतर्फ (विज्ञापन कर र प्राकृतिक स्रोत) प्राप्त आयमा पनि उतार–चढाव देखिएको छ। अन्य सेवा शुल्क तथा बिक्री शिर्षकको कर भने झन्डै दोब्बर बढी वृद्धि भएको पाइएको छ।
यो शिर्षकमा गत आर्थिक वर्षमा चार करोड १२ लाख ५१ हजार राजस्व संकलन भएकोमा चालु आर्थिक वर्षमा आठ करोड २३ लाख ५६ हजार रुपैयाँ कर संकलन भएको छ।
त्यस्तै दण्ड, जरिवाना र जफत शिर्षकमा पनि आम्दानी बढेको छ। यीबाहेक अन्य राजस्व भने अघिल्लो वर्षको तुलनामा घटेको तथ्याङ्कले देखाएको छ।
प्रदेशका मुख्यमन्त्री कमलबहादुर शाहले प्रदेश सरकारको आर्थिक वर्ष कार्यप्रगति, समस्या र चुनौतीको समिक्षा कार्यक्रममा १५ दिनभित्र कार्ययोजना बनाउन मुख्यमन्त्रीको निर्देशन दिएका छन्।
शाहले प्रदेश सरकारका सबै मन्त्रालय तथा मातहतका कार्यालयहरूलाई १५ दिनभित्र स्पष्ट, समयबद्ध र नतिजामुखी कार्ययोजना तयार गर्न निर्देशन दिएका थिए।
उनले सचिवहरूलाई आफ्नो जिम्मेवारी र कार्यक्षेत्र स्पष्ट रूपमा निर्धारण गरी समन्वयका साथ काम गर्न आग्रह गरे।
पुँजीगत खर्च बढाउन कमजोरी पहिचान र तत्काल सुधार गर्नुपर्ने आवश्यकता उनले औंल्याए।
-1756794700.JPG)
-1746009348.jpg)
