योगदानमा आधारित सामाजिक सुरक्षा कोषमा आबद्ध हुँदा श्रमिकहरुले खाइपाई आएको पारिश्रमिक घट्ने भनी भ्रामक टिकाटिप्पणी भएको भन्दै कोषले आपत्ति जनाएको छ।
कोषले शुक्रबार प्रेस विज्ञप्तीमार्फत श्रमिकहरुले खाइपाइ आएको सेवासुविधा कटौती नहुने जनाएको हो।
यस अघि नेपाल वित्तीय कर्मचारी संघले सामाजिक सुरक्षा कोषमा जाँदा वित्तीय क्षेत्रका कर्मचारीहरुको खाइपाइ आएको सेवासुविधा कटौती हुने भएकाले कोषमा नजाने अडान राख्दै प्रेस विज्ञप्ति जारी गरेको थियो।
सो सम्बन्धमा कोषले गम्भीर ध्यानाकर्षण भएको जनाएको छ।
श्रम ऐनको दफा ५२ मा व्यवस्था गरिएको आधारभूत पारिश्रमिकको २० प्रतिशत (सञ्चय कोषबापतको रकम), दफा ५३ मा व्यवस्था भएको न्यूनतम १ वर्ष काम गरेबापत १ महिनाको उपदान, दफा ५४ बमोजिम श्रमिकको १ लाख बराबरको औषधोपचार, दफा ५५ बमोजिम दुर्घटना बीमाका लागि बीमा शुल्क बापतको रकम मात्रै सामाजिक सुरक्षामा कोषमा आउने उसले स्पष्ट पारेको छ।
सोभन्दा बढी सुविधा दिइरहेको भए सम्बन्धित प्रतिष्ठानले नै सम्बन्धित श्रमिकले पाउने गरी व्यवस्था गर्नुपर्ने प्रावधान रहेको कोषले प्रष्ट्याएको हो।
खाइपाइ आएको उपदानको हकलाई सुनिश्चित गर्ने गरी श्रम नियमावली २०७५ मा उल्लेख गरिएको कोषको भनाई छ।
सामाजिक सुरक्षा योजना निजी क्षेत्रका रोजगारदाता तथा श्रमिकका लागि अनिवार्य भएको हुँदा यथाशीघ्र सूचीकृत हुन कोषले आग्रह गरेको छ।
सूचीकृत नहुने रोजगारदातालाई पनि ऐन लाग्ने कोषले जनाएको छ।