एउटा नयाँ परिवार। नयाँ–नयाँ साथीहरू। छुट्टै खालको रोमाञ्चक वातावरण।
दुईदेखि १६ वर्षसम्मका बालबालिका एकै थलोमा थिए। उनीहरूलाई एकआपसमा घुलमिल हुन, रमाइला खेलहरू मिलेर खेल्न, मनका कुरा साटासाट गर्न कुनै समय लागेन।
बिहीबार दिउँसो धुम्बाराहीको एक फनपार्कमा भेला भएका बालबालिकाको खुसी अनुपम थियो। त्यो खुसी उनीहरूसँगै त्यहाँ पुगेका अभिभावकको अनुहारमा पनि प्रतिविम्बित देखिन्थ्यो।
सानेपाकी ८ वर्षीया बालिका र पुरानो बानेश्वरकी उनकै उमेरकी अर्की बालिकाको उमेर मात्र समान थिएन, नाम पनि मिल्दोजुल्दो थियो।
उनीहरूका भावना, सपना र आकांक्षा पनि एकाकार थिए।
'ए साथी! यहाँ आऊ त, सँगै फेस पेन्टिङ गरौं,' सानेपाकी बालिकाको आग्रहलाई नजिकै उभिएकी सहेलीले टार्न सकिनन्।
'लौ त नि' भन्दै उनले अर्को प्रस्ताव गरिन्, 'कति फेस मात्र कोर्नु, जाउँ हिँड, कार चलाउन।'
उनीहरू एकअर्काको ढाडमा अँगालोले बेरिँदै 'बम्पर कार' चलाउन हिँडे।
बझाङका १३ वर्षीय बालक र उनकै उमेका काभ्रेका बालकको मित्रता झांगिन पनि बेर लागेन। उनीहरूको पनि नाममा मात्र समानता थिएन, रूचि र भविष्यको योजनामा पनि मतैक्य देखिन्थ्यो।
'हिँड वाल क्लाइम्बिङमा,' काभ्रेका बालकको चाहनामा साहस भर्दै बझाङका बालकले भने, 'ठूलो भएपछि पर्खाल हैन, हिमाल चढ्नुपर्छ है।'
सायद उनको मनमा आफ्नै गाउँबाट देखिने साइपाल हिमालको झल्को आएको हुनुपर्छ!
गोल्यान ग्रुपले विश्व बाल दिवसको अवसर पारेर बिहीबार फनपार्कमा 'किड्स प्ले–डेट' आयोजना गरेको थियो। कार्यक्रमको केन्द्रमा थिए, जेनजी सहिद परिवारका बालबालिका।
गोल्यान ग्रुपले गत असोज २४ मा सहिद परिवारका बालबालिकाका लागि शैक्षिक वृत्ति योजना घोषणा गरेको थियो। योजनाअन्तर्गत हालसम्म २७ जना बालबालिकालाई १२ कक्षासम्मको शैक्षिक खर्च व्यहोर्न अभिभावकसँग समझदारी गरिएको छ।
किड्स प्ले डेटमा शैक्षिक वृत्ति योजनामा सामेल सहिद परिवारका बालबालिका उपस्थित थिए। उनीहरूले मनका भावना आपसमा साट्नुका साथै विभिन्न मनोरञ्जनात्मक तथा बौद्धिक खेल खेलेर आनन्द लिएका थिए।
'यो जमघटले हामीलाई एउटा परिवारको झल्को दिएको छ,' काठमाडौंका ६ वर्षीय नातिका अभिभावकले भने।
उनको भावनामा समर्थन जनाउँदै गोरखाका अर्का अभिभावकले थपे, 'आखिर परिवार भनेकै सुखदुःखमा एकअर्कालाई साथ दिने समूह त हो।'
जेनजी आन्दोलनमा छोरा गुमाएका ६० वर्षीय ती व्यक्ति दुई र १३ वर्षीय दुई नातिलाई लिएर किड्स प्ले–डेटमा पुगेका थिए।
गोल्यान ग्रुपका प्रबन्ध निर्देशक अक्षय गोल्यानको भावना पनि फरक थिएन। परिस्थितिले एउटा 'नयाँ परिवार' को निर्माण भएको उनको भनाइ थियो। परिवारका सदस्यबीच परिचय आदानप्रदान गर्ने उद्देश्यले जमघट आयोजना गरिएको उनको भनाइ थियो।
'हाम्रो नयाँ परिवार साझा प्रतिबद्धता र उद्देश्यले एकताबद्ध भएको हो,' उनले भने, 'यस्तो परिवार, जहाँ प्रत्येक बालबालिकाको अधिकारको सम्मान, उनीहरूको कदर र संरक्षण गरिन्छ।'
बालबालिकाको हित र विकासमा मात्र देशको समृद्धि सम्भव हुने भएकाले उनीहरूको स्वतन्त्रता, खुसी र अवसरको अधिकार सुनिश्चित गर्नुपर्ने उनले बताए।
गोल्यान ग्रुपका कर्पोरेट अफेयर्स एन्ड कम्युनिकेसन्स प्रमुख ज्योति गैह्रेले विश्व बाल दिवसको अवसर पारेर बालबालिकाको अधिकारको सम्मान र संरक्षण गर्न कार्यक्रम आयोजना गरिएको बताइन्।
'बालबालिकाको खुसीमा उनीहरूको सबै खाले विकासका आयाम जोडिएका हुन्छन्, समाजको समृदिको मार्ग पनि यसबाटै सुरू हुन्छ,' उनले भनिन्, 'आजको किड्स प्ले–डेट यसकै लागि गरिएको हो।'
गोल्यान ग्रुपले जेनजी सहिद परिवारका बालबालिकाका लागि कक्षा १२ सम्म शैक्षिक वृत्ति प्रदान गर्ने घोषणा गरेको थियो। पहिलो चरणमा अभिभावकसँग समझदारीपत्रमा हस्ताक्षर भई दोस्रो चरणमा विद्यालय, अभिभावक र गोल्यान ग्रुपबीच त्रिपक्षीय सम्झौता गर्ने प्रक्रिया सुरू भएको छ।
-1746009348.jpg)
