नेपाल उद्योग वाणिज्य महासंघका अध्यक्ष चन्द्रप्रसाद ढकालले लोकतन्त्र संस्थागत हुँदै गए पनि निजी क्षेत्र निडर रूपमा काम गर्न नपाए देशको विकास यात्रा अवरूद्ध हुने बताएका छन्।
महासंघले आयोजना गरेको शान्ति, स्थायित्व र समृद्धिका लागि सर्वपक्षीय राष्ट्रिय संवाद कार्यक्रममा निजी क्षेत्रको सुरक्षा, सम्मान र काम गर्ने वातावरणबारे गम्भीर प्रश्न उठाइएको छ।
अध्यक्ष ढकालले विगतका आन्दोलनका क्रममा भएका घुसपैठ, तोडफोड र निजी सम्पत्ति माथिका आक्रमणले लगानीकर्ताको मनोबल कमजोर बनेको उल्लेख गरे।
उनले निजी क्षेत्रको सुरक्षा सुनिश्चित गर्न दोषीमाथि कारबाही आवश्यक रहेको बताए।
'निजी क्षेत्र सुरक्षित र सम्मानित भई काम गर्न सकेन भने विकासको अभियान सफल हुँदैन,' उनले भने।
सरकारले मन्त्रिपरिषद्बाट पारित गरेर निजी क्षेत्र संरक्षण एवं प्रवर्द्धन रणनीति कार्यान्वयनको माग गरे।
'रणनीति पारित हुनु मात्र पर्याप्त होइन, कार्यान्वयन नहुँदासम्म निजी क्षेत्रले भरोसा गर्न सक्दैन,' उनले भने।
डेडिकेटेड ट्रक लाइनसम्बन्धी विवाद प्रधानमन्त्रीको पहलमा समाधान भएको भन्दै उनले सरकारप्रति धन्यवाद पनि व्यक्त गरे।
'सरकारले देखाएको पहलले समस्या समाधान सम्भव हुन्छ भन्ने सन्देश दिएको छ,' ढकालले उल्लेख गरे।
ढकालले सरकारले सीमित मात्र रोजगारी सिर्जना गर्ने र बाँकी अधिकांश रोजगारी निजी क्षेत्रबाटै आउने बताए।
'नीतिगत सहजता र सम्पत्तिको सुरक्षा बिना लगानी आउँदैन, लगानी बिना रोजगारी सम्भव हुँदैन,' उनले भने।
युवा पलायनको मूल कारण पनि यही असुरक्षित र झन्झटिलो वातावरण भएको उनको भनाइ थियो।
स्वदेशमै काम गर्ने भरोसा नजागेसम्म विदेशिने क्रम नरोकिने उनले बताए। साथै, अर्थतन्त्रमा ८१ प्रतिशत योगदान दिने निजी क्षेत्रप्रति समाजमा फैलिएको नकारात्मक दृष्टिकोण अन्त्य गर्न सबै पक्षले जिम्मेवारी लिनुपर्नेमा उनले बताए।
-1746009348.jpg)
