पूर्वप्रधानमन्त्री बाबुराम भट्टराईले कुनै पनि आयोजनाको परिणाम निकाल्नका लागि के गर्ने वा कसो गर्ने भनेर धेरै समय खर्च गर्न नहुने बताएका छन्।
बुधबार नेपाल उद्योग वाणिज्य महासंघले आयोजना गरेको सर्वपक्षीय राष्ट्रिय संवाद कार्यक्रममा भट्टराईले अब कसरी गर्ने भन्नेतर्फ केन्द्रित हुनुपर्ने बताए।
‘मैले विगत १५-२० वर्षदेखि यस्ता तारे होटलहरूमा लाखौं खर्च गरेर गरिएका आयोजनाहरू हेरिरहेको छु। तर ती कार्यक्रमहरूबाट सोचेजस्तो परिणाम कहिल्यै आएको छैन,’ उनले भने, ‘अब हामीले के गर्ने वा कसो गर्ने भन्ने कुरामा धेरै समय खर्च गर्नुहुँदैन। बरू कसरी गर्ने र काम किन भइरहेको छैन भन्ने कुराको कारण खोज्नमा केन्द्रित हुनुपर्छ।’
उनले अरू देशभन्दा नेपाल सय वर्ष पछि परेको पनि बताए।
त्यस्तै कृषि उत्पादन बढाउनुपर्ने पनि उनले बताए।
‘नेपालको ६० प्रतिशत जनसंख्या अझै पनि प्राथमिक क्षेत्र (कृषि) मा आश्रित छ। यस्तो निर्वाहमुखी कृषिमा उत्पादकत्व कम हुने भएकोले यसबाट विकास सम्भव छैन। हाम्रो श्रम अहिले पनि 'लाहुरे कल्चर' मा आधारित छ, जहाँ मानिसहरू ऋण तिर्नकै लागि विदेश जान्छन्, जसले गर्दा बचत र लगानी हुन सकेको छैन,’ उनले भने।
-1746009348.jpg)
