सौराहामा सञ्चालनमा आएको पाँचतारे लक्जरी रिसोर्ट 'रोयल टुलिप चितवन' को महाप्रबन्धकमा कृष्णप्रसाद तिमल्सिना नियुक्त भएका छन्।
केटिएम हस्पिटालिटीद्वारा सञ्चालित रिसोर्टले ३० वर्षको अन्तर्राष्ट्रिय अनुभव भएका तिमल्सिनालाई बिहीबारदेखि जिम्मेवारी दिएको हो।
गत असोजदेखि व्यावसायिक रूपमा सञ्चालनमा आएको यस रिसोर्टले पहिलो पटक नेपाली नागरिकलाई महाप्रबन्धकको जिम्मेवारी दिएको हो।
तिमल्सिनाले नेपाल र चीनका विभिन्न अन्तर्राष्ट्रिय चेन होटल तथा रिसोर्टमा नेतृत्वदायी भूमिकामा काम गरिसकेका छन्।
केटिएम हस्पिटालिटी लिमिटेडका अध्यक्ष रामेश्वर शाहका अनुसार होटल निर्माण र सञ्चालनमा स्वदेशी जनशक्तिलाई प्राथमिकता दिइएको छ।
फ्रान्सको लुभ्र होटल्स ग्रुपअन्तर्गतको प्रिमियम ब्राण्ड रोयल टुलिप विश्वका ७० भन्दा बढी देशमा सञ्चालनमा छ।
चितवन राष्ट्रिय निकुञ्जको किनारमा फैलिएको यस रिसोर्टमा ६५ वटा आवास, स्पा, पौडी पोखरी, रेस्टुरेन्ट, लाउन्ज तथा अन्य सुविधाहरू रहेका छन्।
रिसोर्टले विश्वस्तरीय सेवा प्रदान गर्दै स्थानीय संस्कृति प्रवर्द्धन गर्ने लक्ष्य लिएको जनाएको छ।
-1746009348.jpg)
