अमेरिकी राष्ट्रपति चढ्ने विमान 'एयरफोर्स वान' मा समस्या देखिएपछि उडेको केही बेरमै वासिङ्टन फर्किएको छ।
राष्ट्रपति डोनाल्ड ट्रम्प स्वीटजरल्याण्डमा बुधबारदेखि सुरू हुने वर्ल्ड इकोनोमिक फोरममा सहभागी हुन मंगलबार राति वासिङ्टनबाट डाभोस उडेका थिए।
उडेको केही बेरमै एयरफोर्स वानमा सामान्य प्राविधिक समस्या देखिएपछि विमान वासिङ्टन फर्काइएको अमेरिकी अखबार द न्युयोर्क टाइम्सले जनाएको छ।
विमान उडेपछि क्याबिनका बत्तीहरू काम नगरेपछि फर्काएर पुनः वासिङ्टननजिककै ज्वाइन्ट बेस एन्ड्र्युजमा अवतरण गराइएको थियो।
ह्वाइट हाउसकी प्रेस सचिव क्यारोलिन लेभिटले विमान उडेको केही बेरमै समस्या पहिचान भएपछि सावधानीका लागि चालकदलले जोइन्ट बेस एन्ड्र्युजमा फर्काइएको हो।
यद्यपि उडानको कति समयपछि वाशिङ्टन फर्किएको भनेर ह्वाइट हाउसले खुलाएको छैन।
ट्रम्प अर्को विमान चढेर डाभोस पुगिसकेका छन्।
एयर फोर्स वनका रूपमा प्रयोग हुँदै आएको बोइङ ७४७–२००बी विमान सन् १९९० को दशकदेखि सेवामा छ।
राष्ट्रपति ट्रम्पले यस विमानबारे पटक–पटक असन्तुष्टि व्यक्त गर्दै आएका छन्। उनको पहिलो कार्यकालमा अमेरिकी प्रशासनले दुईवटा नयाँ बोइङ ७४७–८ विमान खरिदका लागि बोइङसँगको सम्झौता पुनःवार्ता गरेको थियो।
तर ती विमानहरू उनको दोस्रो कार्यकाल समाप्त हुनुअघि तयार नहुने अनुमान गरिएको छ।
यसैबीच, गत मे महिनामा ट्रम्प प्रशासनले कतार सरकारबाट एक नयाँ बोइङ ७४७–८ जेट स्वीकार गरेको थियो।
उक्त विमानलाई एयर फोर्स वनका रूपमा प्रयोग गर्नुअघि व्यापक सुरक्षा परिमार्जन आवश्यक पर्ने बताइएको छ।
रक्षा मन्त्रालयले आवश्यक सुरक्षा प्रणाली जडान गर्न कति समय लाग्छ भन्नेबारे जानकारी दिएको छैन।
-1746009348.jpg)
