मध्य पूर्वी क्षेत्रमा तनाव बढेपछि त्रिभुवन अन्तर्राष्ट्रिय विमानस्थलले यात्रुहरूलाई एयरलाइन्समा सम्पर्क गर्न सूचना जारी गरेको छ।
शनिबार साँझ त्रिभुवन अन्तर्राष्ट्रिय विमानस्थलले सूचना जारी गर्दै एयरलाइन्समा सम्पर्क गर्न सूचना निकालेको हो।
‘मध्यपूर्व क्षेत्रको हालैको हवाई क्षेत्र प्रतिबन्धका कारण केही अन्तर्राष्ट्रिय उडानहरू ढिलाइ पुन:तालिका वा रद्द हुनसक्ने सम्भावना छ। यात्रुहरूलाई विमानस्थलतर्फ प्रस्थान गर्नुअघि तल उल्लेखित विमान सेवा कम्पनीहरूसँग आफ्नो उडानको पछिल्लो अवस्था अनिवार्य रूपमा पुष्टि गर्न अनुरोध छ,’ सूचनामा भनिएको छ।
एयर अरबिया, फ्लाइ दुबई, जजीरा एयरलाइन्स, कुवेत एयरलाइन्स, कतार एयरवेज, टर्किस एयरलाइन्स, हिमालय एयरलाइन्स र नेपाल एयरलाइन्समा सम्पर्क गर्न अनुरोध गरेको हो।
सारजहा, दोहा, दुबई, कुबेत सिटी, अबुधाबी, कतार तथा दमाम विमानस्थलमा हवाई उडानमा प्रतिबन्ध लगाइएका कारण त्रिभुवन अन्तर्राष्ट्रिय विमानस्थलबाट आज दिउँसो र रातिका सबै उडान रद्द भएका छन्।
अमेरिका र इसराइलले हमला गरेपछि इरानले खाडी र मध्यपूर्वका विभिन्न देशमा रहेका अमेरिकी सैन्य अड्डाहरूमा लक्ष्य गरेर जबाफी हमला गरेको छ।
शनिबार बिहान इसराइलबाट इरानको राजधानी तेहरान लगायतका ठाउँहरूमा हमला भएको थियो। हमलाको केही पछि मात्रै अमेरिकी राष्ट्रपति डोनाल्ड ट्रम्पले इरानमा अमेरिकाले हमला गरेको बताएका थिए।
जबाफमा इरानले इसराइलमा दर्जनौं ब्यालिस्टिक मिसाइल प्रहार गरेको थियो।
-1772288736.jpeg)
-1746009348.jpg)
