कुवेतमा अमेरिकी लडाकू विमान दुर्घटना भएको छ।
सोमबार बिहान कुवेतको अल जहरा नजिक अमेरिकी लडाकू विमान दुर्घटना भएको अमेरिकी टेलिभिजन नेटवर्क सिएनएनले जनाएको छ।
दुर्घटनास्थल कुवेतस्थित अमरिकी वायुसेनाको अड्डा अलि अल सलेम एयरबेसबाट करिब १० किलोमिटर दुरीमा रहेको भनेर सिएनएनले लेखेको छ।
सिएनएनले एउटा भन्दा बढी लडाकू विमान दुर्घटना भएको भनेर लेखेको छ।
कुवेतको रक्षा मन्त्रालयले केही सैन्य विमान दुर्घटना भएको र चालक दलका सबै सदस्यहरू सुरक्षित रहेको जनाएको छ।
मन्त्रालयका प्रवक्ता कर्नेल सइद अल अत्वानले वक्तव्य जारी गरी दुर्घटनापछि सम्बन्धित निकायले तत्काल खोज तथा उद्धार अभियान सुरु गरेको जनाएको छ।
वक्तव्यअनुसार दुर्घटनास्थलबाट चालक दलका सदस्यहरूलाई सुरक्षित उद्धार गरी स्वास्थ्य परीक्षणका लागि अस्पताल पठाइएको छ।
उनीहरूको स्वास्थ्य अवस्था स्थिर रहेको मन्त्रालयले जनाएको छ। कुवेतले अमेरिकी अधिकारीहरूसँग प्रत्यक्ष समन्वयमा काम गरिरहेको पनि प्रवक्ताले बताएका छन्।
सिएनएनले दुर्घटनाको भिडिओ पनि सार्वजनिक गरेको छ।
भिडिओमा कुवेतमा एक लडाकु विमान आगो लाग्दै आकाशबाट घुम्दै खसिरहेको दृश्य देखिएको छ।
अर्को भिडिओमा एक पाइलट प्यारासुटमार्फत जमिनतर्फ झरिरहेको देखिन्छ।
विमान किन दुर्घटनाग्रस्त भयो र कुन देशको वायुसेनासँग सम्बन्धित थियो भन्ने विषयमा आधिकारिक पुष्टि भइसकेको छैन।
तर भिडियो विश्लेषणका आधारमा उक्त दुई इन्जिनयुक्त लडाकु विमान अमेरिकी एफ–१५ई मोडेलसँग मिल्दोजुल्दो देखिएको सिएनएनले जनाएको छ।
बेलायतबाट प्रकाशन हुने अनलाइन टेलिग्राफले भने उक्त विमान इरानले खसालेको बताएको छ।
इरानी अधिकारीहरूलाई उद्धृत गरेर टेलिग्राफले उक्त फाइटर जेट इरानले खसालेको दाबी गरेको हो।
-1746009348.jpg)
