काठमाडौंबाट सुर्खेतका लागि उडेको श्री एयरलाइन्सको जहाज अवतरण गर्ने क्रममा टायर पड्किएको छ।
आज दिउँसो सवा ३ बजे काठमाडौंबाट सुर्खेतका लागि टेकअफ गरेको उडान नम्बर नाइनएन-एओएल कल साइन भएको जहाजले ३:५० बजे सुर्खेत विमानस्थलमा अवतरण गर्ने क्रममा जहाजको पछाडिको बायाँतर्फ बाहिरी टायर घर्षणका कारण पड्किएको प्रहरीले जनाएको छ।
प्रहरीका अनुसार टायर पड्किए पनि जहाज सुरक्षित रूपमा अवतरण गरिएको र सबै यात्रु तथा चालकदल सकुशल छन्।
जहाजको आवश्यक प्राविधिक जाँच तथा मर्मतपछि मात्र पुनः उडान सञ्चालन गरिने बताइएको छ।
