नेपाल वायुसेवा निगमले दुबईतर्फको उडान पुनः सञ्चालन गर्ने भएको छ।
अमेरिका–इसराइल र इरानबीच द्वन्द्व भएपछि यहाँबाट हुने उडान रद्द भएका थिए।
मंगलबार एक सूचना जारी गर्दै निगमले यात्रुको सहजताका लागि दुबई उडान सञ्चालन गर्न लागिएको जानकारी दिएको छ।
निगमका अनुसार आरए २२९ नम्बरको उडान ११ मार्चमा काठमाडौंबाट दुबईका लागि स्थानीय समयअनुसार राति ११:१५ बजे प्रस्थान गर्नेछ।
त्यस्तै आरए २३० नम्बरको फिर्ता उडान १२ मार्चमा दुबईबाट काठमाडौंका लागि स्थानीय समयअनुसार बिहान ४ः१० बजे प्रस्थान गर्ने निगमले जनाएको छ।
निगमले यात्रुलाई उडान समयअनुसार आवश्यक तयारी गर्न र थप जानकारीका लागि सम्बन्धित माध्यमबाट जानकारी लिन पनि अनुरोध गरेको छ।
निगमले जारी गरेको अर्को सूचना अनुसार बुधबारका लागि हुने भनिएका काठमाडौं–दोहा र काठमाडौं–दमाम उडान तत्काललाई रद्द भएको छ।
त्यस्तै, बिहीबार हुने दोहा–काठमाडौं र दमाम–काठमाडौंका लागि हुने भनिएको उडान पनि रद्द गरिएको कम्पनीले जनाएको छ।
-1746009348.jpg)
