निजी क्षेत्रको वायुसेवा प्रदायक बुद्ध एयरले आफ्नो कल साइन ९एन–एजेओ रहेको एटिआर–७२ जहाजलाई पूर्ण उडान क्षमता पूरा भएपछि औपचारिक रूपमा बिदाइ गरेको छ।
विश्वमै पहिलो पटक एटिआर–७२ जहाजले तोकिएको अधिकतम उडान चक्र पूरा गरी सेवाबाट अवकाश लिएको कम्पनीले जनाएको छ।
एटिआर–७२ जहाजको अधिकतम उडान क्षमता ७२ हजार चक्र मानिन्छ। उडान चक्र भन्नाले जहाजको एक पटक उडान भरी गन्तव्यमा अवतरण गर्ने प्रक्रियालाई जनाइन्छ।
यो जहाज २०१० जुलाई २ देखि व्यावसायिक उडानमा सञ्चालनमा आएको थियो। यसको अन्तिम उडान २०२६ मार्च ९ मा भैरहवाबाट काठमाडौंसम्म गरिएको थियो।
१६ वर्षको सेवा अवधिमा उक्त जहाजले कुल २४ लाख ८२ हजार ७ सय ७२ जना यात्रुलाई सुरक्षित रूपमा सेवा प्रदान गरेको कम्पनीले जनाएको छ।
जहाजको बिदाइका अवसरमा भावुक बनेका बुद्ध एयरका कार्यकारी अध्यक्ष वीरेन्द्र बहादुर बस्नेतले यस जहाजले नेपालको हवाई यात्रालाई सुगम, सुलभ र वातावरणमैत्री बनाउन महत्वपूर्ण योगदान दिएको बताए।
उनका अनुसार उक्त जहाजले कम्पनीको बजार विस्तार र प्रतिष्ठा अभिवृद्धिमा समेत उल्लेखनीय भूमिका खेलेको छ।
साथै एटिआर जहाजको पूर्ण आयु सञ्चालन गर्ने ऐतिहासिक उपलब्धि हासिल गरिएको उनले उल्लेख गरे।
यसैगरी नेपाल नागरिक उड्डयन प्राधिकरणका महाप्रबन्धक टेकनाथ सिटौलाले बुद्ध एयरको हवाई सुरक्षाप्रतिको दृढ प्रतिबद्धता, उत्कृष्ट मर्मत–सम्भार तथा व्यवस्थापनका कारण एटीआर–७२ जहाजलाई सफलतापूर्वक बिदाइ गर्न सम्भव भएको बताए।
एटिआर निर्माण कम्पनीका वरिष्ठ उपाध्यक्ष स्टेफानो माराज्जनी ले बुद्ध एयरसँगको सहकार्यप्रति खुशी व्यक्त गर्दै कम्पनीले निर्माण गरेको उक्त विमान योग्य हात, उपयुक्त सञ्चालन वातावरण तथा उच्च प्राविधिक व्यवस्थापनका कारण अन्तिम उडानसम्म सुरक्षित सेवा दिन सफल भएको बताए।
यसले बुद्ध एयरको उच्च सुरक्षा मापदण्डप्रतिको प्रतिबद्धता पुनः प्रमाणित गरेको उनले उल्लेख गरे।
यसअघि बुद्ध एयरले एटिआर–४२ जहाजलाई २०२४ सेप्टेम्बर १० मा सेवाबाट बिदाइ गरिसकेको छ।
हाल बुद्ध एयरले आन्तरिकतर्फ देशका विभिन्न गन्तव्यमा नियमित उडान सञ्चालन गर्दै आएको छ। साथै पोखराबाट सिधा नेपालगञ्ज, भैरहवा र भरतपुरसम्म उडान सञ्चालन गरिरहेको छ।
अन्तर्राष्ट्रिय सेवातर्फ भने भारतका वाराणसी र कोलकातामा उडान सञ्चालन भइरहेको कम्पनीले जनाएको छ।
-1746009348.jpg)
