वायुसेवा प्रदायक कम्पनी श्री एयरलाइन्सले छिमेकी मुलुकका तीनवटा सहरमा नियमित उडान गर्ने अनुमति पाएको छ।
नेपाल नागरिक उड्डयन प्राधिकरणले एयरलाइन्सको 'एयर अपरेटर सर्टिफिकेट' संशोधन गर्दै यो नयाँ बाटो खोलेको हो।
प्राधिकरणका सूचना अधिकारी ज्ञानेन्द्र भुलका अनुसार श्री एयरलाइन्सले अब काठमाडौंबाट भारतको दिल्ली र कोलकाता तथा बंगलादेशको ढाकामा नियमित रूपमा यात्री लैजान र ल्याउन पाउनेछ।
यसअघि आन्तरिक उडान र विदेशमा चार्टर उडान मात्रै गर्दै आएको यस कम्पनीले अब तोकिएको समय तालिकाअनुसार नै यी गन्तव्यहरूमा सेवा दिनेछ।
प्राधिकरणले वैशाख ४ गते जारी गरेको निर्णयअनुसार यी उडानका लागि कम्पनीका चारवटा जहाजले अनुमति पाएका छन्।
जसमा दुईवटा सिआरजे र दुईवटा डिएचसी–८ सिरिजका जहाज रहेका छन्।
यी विमानहरू मार्फत एयरलाइन्सले अब काठमाडौं–दिल्ली–काठमाडौं, काठमाडौं–कोलकाता–काठमाडौं र काठमाडौं–ढाका–काठमाडौं रुटमा व्यावसायिक उडान भर्नेछ।
यसअघि निजी क्षेत्रबाट बुद्ध एयरले मात्र नियमित अन्तर्राष्ट्रिय उडानको अनुमति पाएको थियो।
अब श्री एयरलाइन्स पनि थपिएपछि नेपालबाट विदेशमा नियमित उडान गर्ने नेपाली विमान कम्पनीको संख्या चार पुगेको छ।
यसमा नेपाल वायुसेवा निगम, हिमालय एयरलाइन्स, बुद्ध एयर र श्री एयरलाइन्स रहेका छन्।
यति एयरलाइन्सले भने हालसम्म विदेशमा चार्टर उडानको मात्र अनुमति पाएको थियो।
यो नयाँ अनुमतिसँगै अन्तर्राष्ट्रिय हवाई क्षेत्रमा प्रतिस्पर्धा बढ्ने र यात्रीहरूलाई थप सहज हुने विश्वास लिइएको छ।
