नेपालको पर्यटन क्षेत्रलाई अन्तर्राष्ट्रिय बजारमा सुरक्षित र आकर्षक गन्तव्यका रूपमा प्रवर्द्धन गर्ने उद्देश्यसहित रुप्से होलिडेजको विशेष अग्रसरता, पहल तथा व्यवस्थापनमा श्रीलंकाका करिब १५० जना प्रतिष्ठित ट्राभल एजेन्ट तथा पर्यटन व्यवसायी नेपाल आएका छन्।
श्रीलंकाका पर्यटन क्षेत्रका दुई महत्त्वपूर्ण संस्था ट्राभल एजेन्ट्स एसोसिएसन अफ श्रीलंका (टिएएएसएल) र आइएटिए एजेन्ट्स एसोसिएसन अफ श्रीलंका (आइएएएसएल) को वार्षिक साधारणसभा (एजिएम) नेपालमा आयोजना गराउन रुप्से होलिडेजले महत्त्वपूर्ण भूमिका निर्वाह गरेको हो।
काठमाडौंको दुसित प्रिन्सेस होटलमा १७ देखि २० सेप्टेम्बर २०२६ सम्म आयोजना भइरहेको कार्यक्रममा टिएएएसएलको ५१औं तथा आईएएएसएलको ३८औं एजिएम सम्पन्न भएको छ।
टिएएएसएलको आधिकारिक विवरणले समेत काठमाडौंलाई दुवै संस्थाको यस वर्षको एजिएम गन्तव्यका रूपमा उल्लेख गरेको छ।
अघिल्लो वर्ष क्रुजमा, यस वर्ष नेपालमा
यी प्रतिष्ठित संस्थाहरूले आफ्नो एजिएमका लागि हरेक वर्ष विभिन्न अन्तर्राष्ट्रिय गन्तव्य छनोट गर्दै आएका छन्।
सन् २०२५ मा टिएएएसएलको ५०औं एजिएम तथा आइएएएसएलको ३७औं एजिएम जेन्टिङ ड्रिम/रिसोर्ट्स वर्ल्ड जेन्टिङ क्रुजमा सिंगापुर–मलेसिया क्षेत्रमा आयोजना गरिएको थियो।
उक्त कार्यक्रममा पनि करिब १५० सहभागी रहेको टिएएएसएलको आधिकारिक विवरणमा उल्लेख छ।
यसअघि बेइजिङ, टोकियो, इस्तानबुल, बैंकक, जकार्ता, बाकु र मेलबर्नलगायतका अन्तर्राष्ट्रिय गन्तव्यमा एजिएम गरिसकेका यी संस्थाले यसपटक काठमाडौंलाई रोज्नु नेपालको पर्यटनका लागि महत्त्वपूर्ण अन्तर्राष्ट्रिय प्रवर्द्धनको अवसर बनेको छ।
यसलाई नेपालसम्म ल्याउन र ठूलो संख्यामा श्रीलंकाका प्रभावशाली पर्यटन व्यवसायीलाई एकैपटक नेपाल भ्रमण गराउन रुप्से होलिडेजले पहल, समन्वय तथा व्यवस्थापनमा नेतृत्वदायी भूमिका निर्वाह गरेको छ।
रुप्से होलिडेजको पहल: 'नेपाल सुरक्षित छ, नेपालले बोलाइरहेको छ'
नेपालको पर्यटन क्षेत्रले पछिल्लो समय सामना गरिरहेका चुनौतीका बीच अन्तर्राष्ट्रिय बजारमा नेपालबारे सकारात्मक सन्देश पुर्याउनुपर्ने आवश्यकता महसुस गर्दै रुप्से होलिडेजले यस कार्यक्रमलाई एजिएममा मात्र सीमित नराखी नेपालको पर्यटन विश्वास निर्माण अभियानका रूपमा अगाडि बढाएको छ।
कार्यक्रमभरि एउटा साझा सन्देश विशेष रूपमा उठाइएको छ- 'नेपाल सुरक्षित छ, नेपालले बोलाइरहेको छ।'
नेपाल सुरक्षित छ, नेपाल पर्यटकलाई स्वागत गर्न तयार छ र अन्तर्राष्ट्रिय पर्यटकले निर्धक्क भएर नेपाल भ्रमण गर्न सक्छन् भन्ने सन्देश श्रीलंकाका पर्यटन व्यवसायीमार्फत त्यहाँको बजारसम्म पुर्याउने उद्देश्य कार्यक्रमको महत्त्वपूर्ण पक्ष रहेको छ।
एजिएमपछिको गाला डिनरमा पर्यटन क्षेत्रका विशिष्ट व्यक्तित्व
आज एजिएम सम्पन्न भएपछि आयोजित विशेष गाला डिनर कार्यक्रममा नेपाल र श्रीलंकाका पर्यटन तथा उड्डयन क्षेत्रका विशिष्ट व्यक्तित्वहरूको उल्लेखनीय सहभागिता रहेको थियो।
कार्यक्रममा नेपालका लागि श्रीलंकाका राजदूत, श्रीलंकन एयरलाइन्सका कमर्सियल डाइरेक्टर, नाट्टा अध्यक्ष भरत जंग पाण्डे, नाट्टा महासचिव राजकुमार देवकोटा, नेपाल पर्यटन बोर्डका सन्तोष, श्रीलंकन एयरलाइन्सका जिएसए सञ्चालक जय देवानलगायत नेपाल तथा श्रीलंकाका प्रतिष्ठित पर्यटन व्यवसायीहरूको सहभागिता रहेको थियो।
नेपालको वर्तमान अवस्थाबारे अन्तर्राष्ट्रिय बजारमा सकारात्मक र यथार्थ सन्देश प्रवाह गर्दै पर्यटकलाई नेपाल भ्रमणका लागि प्रोत्साहित गर्न पर्यटन क्षेत्र एकताबद्ध भएर अघि बढ्नुपर्नेमा सहभागीहरूले जोड दिएका थिए।
नाट्टा सचिवसमेत रहेका रुप्से होलिडेजका सिइओ रमेश पराजुली यस कार्यक्रमको पहल गर्ने रुप्से होलिडेजका संस्थापक तथा प्रमुख कार्यकारी अधिकृत रमेश पराजुली नेपाल एसोसिएसन अफ टुर एन्ड ट्राभल एजेन्ट्स (नाट्टा) का वर्तमान सचिवसमेत हुन्।
नाट्टाको २०२६ को निर्वाचनबाट भरत जंग पाण्डे अध्यक्ष, राजकुमार देवकोटा महासचिव तथा रमेश पराजुली सचिवमा निर्वाचित भएका हुन्।
पराजुलीले नेपालको पर्यटन क्षेत्र चुनौतीपूर्ण अवस्थामा रहेका बेला केवल सरकार वा पर्यटन बोर्डको प्रयासले मात्र नभई निजी क्षेत्र र पर्यटन व्यवसायी आफैंले अन्तर्राष्ट्रिय बजारमा गएर वा विदेशी व्यवसायीलाई नेपाल ल्याएर विश्वास निर्माण गर्नुपर्ने आवश्यकता रहेको बताएका छन्।
उनका अनुसार १५० जना अग्रणी श्रीलंकाली ट्राभल एजेन्टलाई नेपालमा ल्याउनुको अर्थ केवल एउटा एजिएम आयोजना गर्नु होइन।
यी व्यवसायीहरू स्वयं आफ्ना बजारमा हजारौं यात्रुलाई गन्तव्य सिफारिस गर्ने व्यक्ति भएकाले उनीहरूले नेपाल प्रत्यक्ष अनुभव गरेर फर्कनु आफैंमा प्रभावकारी गन्तव्य प्रवर्द्धन हो।
श्रीलंकाबाट नेपाल पर्यटन बढाउने अवसर
टिएएएसएल श्रीलंकाका ट्राभल एजेन्टहरूको प्रमुख व्यावसायिक संस्था हो भने आइएएएसएलले आइएटिए मान्यता प्राप्त एजेन्टहरूको प्रतिनिधित्व गर्दै आएको छ।
आइएएएसएलको नेतृत्वमा लामो समयदेखि श्रीलंकाको ट्राभल, एयरलाइन तथा पर्यटन उद्योगमा सक्रिय व्यवसायीहरू रहेका छन्।
त्यसैले यी संस्थासँग आबद्ध करिब १५० जना पर्यटन व्यवसायीको नेपाल भ्रमणलाई सामान्य समूह भ्रमणभन्दा फरक रूपमा हेरिएको छ।
उनीहरू नेपालका पर्यटन दूत तथा व्यापार विस्तारकका रूपमा आफ्नो बजारमा नेपालबारे प्रत्यक्ष अनुभव सुनाउन र नेपालका प्याकेज बिक्री गर्न सक्ने समूह हुन्।
रुप्से होलिडेजले यो कार्यक्रममार्फत नेपाल–श्रीलंका बी२बी पर्यटन सञ्जाल, नेपालका पर्यटन उत्पादनको प्रवर्द्धन तथा भविष्यमा श्रीलंकाबाट नेपाल आउने पर्यटक संख्या बढाउने आधार निर्माण हुने विश्वास व्यक्त गरेको छ।
विश्वका विभिन्न गन्तव्यमा एजिएम गर्दै आएको श्रीलंकाको प्रतिष्ठित पर्यटन समुदायलाई यस वर्ष नेपाल ल्याउन सफल हुनु र उनीहरूमार्फत एउटै आवाजमानेपाल सुरक्षित छ, नेपालले बोलाइरहेको छ' भन्ने सन्देश प्रवाह हुनु नेपालको पर्यटन प्रवर्द्धनका लागि सकारात्मक पहलका रूपमा हेरिएको छ।
रुप्से होलिडेजको अग्रसरतामा भएको यो कार्यक्रमले नेपाल सुरक्षित मात्र होइन, अन्तर्राष्ट्रिय पर्यटन समुदायलाई स्वागत गर्न पूर्ण रूपमा तयार रहेको सन्देश श्रीलंकासहित विश्व पर्यटन बजारमा पुर्याउने अपेक्षा गरिएको छ।
-1746009348.jpg)
