नेपालबाट उच्च शिक्षाका लागि विदेश जाने युवाको संख्या निरन्तर बढिरहेको छ।
लर्निङ डिस्कोर्सको यो अंकमा नरोत्तम अर्यालले उच्च शिक्षाका लागि विदेश गएर फर्किएका उद्गम खड्कासँग विद्यार्थी पलायनका प्रमुख कारण, विदेशमा पाइने अनुभव र कसरी नेपालमा फर्किएर काम गर्न सकिन्छ भन्नेबारे छलफल गरेका छन्।
फिनल्यान्डमा उच्च शिक्षा पूरा गरेर नेपाल फर्किएका उद्गमले विदेश गएर पढ्दा सोच र दायरा फराकिलो भएको बताएका छन्। त्यहाँको शिक्षा विश्वास र समानतामा आधारित भएको पनि उनले बताएका छन्।
'त्यहाँ प्रोफेसरहरूलाई पूर्ण विश्वास गरिन्छ र विद्यार्थीलाई आफ्नो विचार स्वतन्त्र रूपमा व्यक्त गर्न प्रोत्साहन दिइन्छ,' उनले भने।
यस्तै, फिनल्यान्डमा अपांगता भएका, बच्चाका आमाहरू र विभिन्न आवश्यकता भएका विद्यार्थीलाई समेत समान अवसर दिइन्छ। पछि परेका विद्यार्थीलाई थप सपोर्ट हुने भएकाले उनीहरूमा उच्च साक्षरता रहेको उनले बताए।
नेपालको भने शिक्षा सीमित र अंकको भूमरीमा परेको उनको भनाइ छ। कक्षाबाहिरको सिकाइ र व्यावहारिक ज्ञान न्यून भएकाले पनि धेरै युवाहरू विदेशिएको उनको बुझाइ छ।
विद्यार्थीलाई विदेश जान रोक्न नहुने तर फर्किने वातावरण बनाउनुपर्नेमा उनी जोड दिन्छन्।
'नेपालभित्रै प्रदेश प्रदेशबीच सेमेस्टर एक्सचेन्ज, अन्तर्राष्ट्रिय विद्यार्थी आकर्षण गर्ने विशेष कोर्सहरू जस्तै- माउन्टेनियरिङ, जलवायु, संस्कृति र कक्षाकोठा बाहिरका गतिविधिलाई प्राथमिकता दिन सके धेरै युवालाई यहीँ अड्याउन सकिन्छ,' उनले भने, 'नेपालको उच्च शिक्षालाई विद्यार्थीको आकांक्षा र देशको आवश्यकतासँग जोडेर सुधार गर्नुपर्छ।'
प्रस्तुत छ उद्गम खड्कासँग नरोत्तम अर्यालले गरेको बहसः
