मलेशियाका पूर्वप्रधानमन्त्री महाथिर मोहमदले सन् १९५७ देखि निरन्तर सत्तामा रहेको दललाई आम चुनावमा हराउँदै राजनीतिक पुनरागमन गरेका छन्।
सरकार बनाउन ११२ सिट आवश्यक हुने ठाउँमा ११५ सिट जित्दै पूर्व प्रधानमन्त्री महातिर मोहम्मद नेतृत्वको विपक्षी गठबन्धनले आम चुनावमा ऐतिहासिक जित निकालेको हो।
९२ वर्षिय मोहम्मद नेतृत्वको गठबन्धनले गएको ६० वर्षदेखि सत्तामा रहेको बारिसन नेशनल (बिएन) गठबन्धनलाई हराएको हो।
महाथिरले कुनै समयमा वर्षौ आफूले नेतृत्व गरेको बारिसन नाशिओनल पार्टी र आफैंले हुर्काएका नेता नजिब रजाकलाई चुनौती दिन राजनीतिबाट अवकाश लिने निर्णय फिर्ता लिएका थिए।
प्रधानमन्त्री नजिबको कार्यकाललाई लामो समयदेखिका भ्रष्टाचारका आरोपले छायाँमा पारिदिएको थियो।
उनको शासनकालमा मलेशियाली नागरिकहरूले बढ्दो जीविकोर्पजन खर्च व्यहोर्नुका साथै जातीय तनावहरू पनि खेपेका थिए।
बिबिसीका अनुसार मलेसियाबारेका एकदमै जानकार कैयौं विश्लेषकहरूका लागि समेत पछिल्लो चुनावी परिणाम आश्चर्यको विषय बनेको छ।
बिएन र यो गठबन्धनको प्रमुख पार्टी, संयुक्त मलेसिया राष्ट्रिय संगठन (युएनएनओ) सन् १९५७ मा बेलायतबाट देश स्वतन्त्र भएदेखि नै सत्तामा थियो। तर गएको केही वर्षदेखि उसको लोकप्रियता घटेको थियो।
महाथिरको जितले देश स्वतन्त्र भएदेखि सरकारको नेतृत्व गरिरहेको पार्टीको शासनकाल अन्त्य गरिदिएको छ।
मोहम्मद अब मलेसियाको प्रधानमन्त्री बन्नेछन्। शपथ ग्रहण समारोह आउँदो बिहीबार हुने अपेक्षा गरिएको छ।
उनी विश्व सबैभन्दा बढी उमेरको निर्वाचित नेता बन्नेछन्।
यसअघि पदबाट हट्दा मलावीका पूर्व राष्ट्रपति हेस्टिङ्स बन्डा ९६ वर्षका थिए। त्यसै गरी अघिल्लो साल जिम्बाव्वेका नेता रोबर्ट मुगाबेले ९३ वर्षको उमेरमा पदबाट राजीनामा दिएका थिए।
९२ वर्षको उमेरमा सत्तामा पुनरागमन गरेका महाथिरले त्यसै पनि इतिहासमा आफ्नो नाम दर्ता गराइसकेका छन्।
महाथिरले सन् २००३ मा प्रधानमन्त्रीको पद छोडेका थिए। प्रधानमन्त्रीका रूपमा उनले दुई दशकभन्दा बढी समय सत्ता चलाएका थिए।
चुनावको नतिजा घोषणा भएसँगै पार्टीका समर्थकले उत्सव मनाएका छन्।
