अमेरिका र इसराइलसँगको जारी युद्धमा रूस र चीनले सैन्य सहयोग प्रदान गरिरहेको इरानले दाबी गरेको छ।
अमेरिकी मिडिया 'एमएस नाउ' (पहिले एमएसएनबीसी) सँगको अन्तर्वार्तामा इरानी विदेश मन्त्री अब्बास अरागचीले युद्धको समयमा रूस र चीन इरानका लागि रणनीतिक साझेदार भएको बताएका छन्।
'हाम्रो विगतमा पनि घनिष्ठ सहयोग थियो, जुन अहिले पनि जारी छ र यसमा सैन्य सहयोग पनि समावेश छ,' विदेश मन्त्री अरागचीले भने।
जारी युद्धमा अमेरिकी सैन्य संरचना र पछिल्ला गतिविधिको सटिक सूचना पाएर इरानले हमला गरिरहेको जस्तो देखिएको समाचार आएका छन्। कतिले रूसले इरानलाई त्यस्तो खुफिया सूचना प्रदान गरिरहेको भनेर टिप्पणी गरेका थिए।
अमेरिकी राष्ट्रपति डोनाल्ड ट्रम्पले पनि शुक्रबार सार्वजनिक रूपमा रूसले इरानलाई सहयोग गरिरहेको हुनसक्ने बताएका थिए। अमेरिकाले रूससँगको युद्धमा युक्रेनलाई सहयोग गरे जस्तै रूसी राष्ट्रपति भ्लादिमिर पुटिनले पनि इरानलाई थोरै मद्दत गरिरहेको हुन सक्ने उनले अनुमान गरेका थिए।
साढे तीन दशकअघि सोभियत संघ विघटन भएपछि रूस र इरानको सम्बन्ध विस्तार भइरहेको छ।
सन् २०२२ मा रूसले युक्रेनमाथि आक्रमण गरेपछि यो सम्बन्ध झन् बलियो भएको छ। युक्रेनसँग लड्न इरानले रूसलाई शाहिद ड्रोन मात्र नभई धेरै गोलाबारूद दिएको थियो। इरानी प्रविधि हस्तान्तरणपछि ती ड्रोन अहिले रूसमै बन्छन्।
आफ्ना हतियार युक्रेनसँगको युद्धमा नै खर्च भइरहेकाले रूसले अहिले चाहेर पनि इरानलाई हतियार दिन-बेच्न सक्दैन। फेरि इरानलाई हतियार दिए ट्रम्प रिसाएर युक्रेनलाई रूससँगको युद्धमा सहयोग गर्लान् भन्ने पुटिनलाई डर छ। तर हतियार नदिए पनि रूसले इरानलाई आक्रमण गर्न गोप्य सूचना प्रदान गरिरहेको आँकलन भइरहेको थियो।
इरानी विदेश मन्त्री अरागचीले त्यो कुरा स्वीकार गरेका छन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
