नेपाली कांग्रेसका सहमहामन्त्री योगेन्द्र चौधरीले आफ्नो सामाजिक संजालमा दाजु सुरेन्द्र चौधरीको तस्बिर राखेर भावुक स्ट्याटस लेखेका छन्।
कांग्रेसका प्रत्यक्ष तर्फका उम्मेदवार सहमहामन्त्री भाइ योगेन्द्र पराजित भए पनि दाजु रास्वपाबाट समानुपातिक सूचीमा सिफारिस सम्बन्धी समाचार सार्वजनिक भएपछि योगेन्द्रले सोमबार स्ट्याटस लेखेका हुन्।
योगेन्द्र फागुन २१ गते भएको प्रतिनिधिसभा सदस्य पदमा कांग्रेसबाट प्रत्यक्ष तर्फका उम्मेदवार थिए भने उनका दाजु सुरेन्द्र राष्ट्रिय स्वतन्त्र पार्टी (रास्वपा) बाट समानुपातिकका उम्मेदवार थिए।
निर्वाचनको परिणाम आएको हप्ता दिनपछि योगेन्द्रले दाजु सुरेन्द्रको तस्बिर राखेर पहिलो पटक औपचारिक रूपमा बधाई दिनुका साथै दाजुभाइ बीचको नाता सम्बन्ध तथा राजनीति र चुनावी कुरा पनि लेखेका छन्।
योगेन्द्रले दाजु सुरेन्द्रलाई भाइ हुनु आफ्नो दोष नभएको उल्लेख गरेका छन्। राजनीति दाजु र भाइको नाताले गरिने विषयवस्तु नभएको तथा दाजु सुरेन्द्रले राजनीतिक दल चुन्ने स्वतन्त्रताको कुरा भएको उल्लेख गरे।
त्यस्तै योगेन्द्रले दाजु सुरेन्द्रलाई निर्वाचनको समयमा सहोदर भाइका विरूद्ध आफू उम्मेदवार रहेको भन्ने भाषण गरेर सस्तो लोकप्रियता कमाउन खोजेको दोषारोपण पनि गरेका छन्।
योगेन्द्रले लेखेको स्ट्याटसमा निर्वाचन दाजु र भाइको विषय नहुने बरू त्यो बहस र एजेण्डा तथा विचारको हुनुपथ्र्यौ भन्ने सम्झाउन खोजेका छन्।
निर्वाचनमा दाजुले आफू भाइरल हुनका लागि भाइ–भाइ बीचको कुरा निकालेकोप्रति चित्त दुखाएको आभास झल्किएको छ।
योगेन्द्रले हार वा जित सधैंका निम्ति नहुने भन्दै देश बनोस् भन्ने कामना पनि गरेका छन्।
‘माननीय हुन सफल हुनु भएकोमा बधाई दिन चाहन्छु। राम्रो गर्नु होला,’ योगेन्द्रले दाजुको नाममा लेखका छन्, ‘यो ऐतिहासिक अवसरलाई देश र देउखुरी बासीले सम्झनेगरी काम गर्नुहोला।’
योगेन्द्रले आफ्नो पार्टी नेपाली कांग्रेस आफ्नो नेतृत्वप्रति गर्व रहेको कुरा पनि उल्लेख गरेका छन्।
‘चुनाव हारेको छु। हार र जित त जीवनको एउटा हिस्सा हो। मैले यो चुनावको परिणामलाई यसैगरी लिएको छु,’ नेता योगेन्द्रले भनेका छन्, ‘मलाई देउखुरीका बहुसंख्यक मतदाताले अस्वीकार गरेका छन्। तपाईंको उम्मेदवारभन्दा मेरो योगदान र योग्यता पुगेन भन्ने जनताको फैसलाको उच्च सम्मान गरेको छु। जनता सँगै हुन्छु। जनताको साथमै हुन्छु। अन्तमा पुन: बधाई तथा कार्यकालको शुभकामना। जय नेपाल।’
यो पनि:
कांग्रेसबाट भाइले चुनाव हारे, दाइ रास्वपाबाट समानुपातिक सांसद सिफारिस
-1746009348.jpg)
