नेपालस्थित अमेरिकी राजदूतावास सामाजिक सञ्जालमा निकै सक्रिय छ। राजदूत र्यान्डी बेरी, दूतावासकी प्रवक्ता एन्डी डी आर्मेन्ट पनि नेपालका विभिन्न विषयमा सामाजिक सञ्जालमा सक्रियताका साथ अन्तर्क्रिया गर्छिन्।
तर पछिल्लो समय दूतावासको यही ‘सक्रियता’ विवादमा परेको छ। दुई दिनअघि राजदुत बेरीले आफूले अब ‘राजदूतसँग गफगाफ’ कार्यक्रमअन्तर्गत सामाजिक सञ्जालमा नेपालीहरूसँग कुराकानी गर्ने बताएका छन्। अमेरिकी दूतावासलाई सामाजिक सञ्जालमा पछ्याउने झन्डै ४० लाख नेपाली सबैलाई भेट्न सम्भव नहुने भन्दै राजदूत बेरी उनीहरूसँग कुराकानी गर्न नयाँ श्रृंखला सुरू गर्न लागेको बताएका छन्।
राजदूतसँगको गफगाफमा अमेरिकामा अध्ययन, डिभी, भिसालगायत विभिन्न विषयमा जिज्ञासा, अमेरिकी राजदूतको नेपाल बसाइका अनुभवबारे छोटाछोटा भिडिओ क्लिप बनाएर साप्ताहिक रूपमा सामाजिक सञ्जालमा राखिने दूतावासको भनाइ छ।
तर केही सामाजिक सञ्जाल प्रयोगकर्ताहरूले दूतावासले यसो गर्नु कूटनीतिक मर्यादा अनुकूल नहुने तर्क गरेका छन्। अमेरिकी राजदूतजस्तै भोलि चीन र भारतका राजदूतले पनि यस्तै कार्यक्रम सुरू गरे के होला? भन्ने उनीहरूको प्रश्न छ।
अमेरिकी दूतावासकी प्रवक्ता आर्मेन्टले भने राजदूतको यस्तो गफगाफ कूटनीतिभित्रै पर्ने तर्क गरेकी छन्।
परराष्ट्र मन्त्रालयले अमेरिकी दूतावासको यो विवादबारे औपचारिक प्रतिक्रिया जनाएको छैन। मन्त्रालयका एक अधिकारीले राजदूतले गर्न लागेको के हो र यस्तो गर्न मिल्छ कि मिल्दैन? भन्नेबारे बुझ्ने काम भइरहेको सेतोपाटीलाई बताए।
-1746009348.jpg)
