चिनियाँ अन्तराष्ट्रिय विभागका प्रमुख सङ ताओ यतिबेला नेपालमा छन्। सत्तारुढ नेपाल कम्युनिष्ट पार्टी र चिनियाँ कम्युनिष्ट पार्टीबीच हुने विचारधारात्मक छलफलमा भाग लिन उनी नेपाल आएका हुन्।
सोमबार राजधानीको याक एण्ड यति होटलमा उक्त कार्यक्रमको उद्घाटन समारोह भयो। त्यहाँ उनले चीनले अङ्गालेको सी चिनफिङ् विचाराधारबारे व्याख्या गरे। सि चिनफिङ विचारधारा चिनियाँ विशेषतायुक्त भएको बताए। अनि त्यसका पाँच वटा पक्षको बारे विस्तृतमा बताए।
पहिलो, पाओले सि चिनफिङ विचारधाराले मार्क्सवादलाई जडसुत्रवादका रुपमा लिँदैन। ‘माओत्सेतुङ विचारधारा, देङ सियाओपिङ विचारधारा हुँदै चिनियाँ विशेषतायुक्त सि चिनफिङ विचारधारा विकास भएको छ’, ताओले भने, ‘माक्सवादको विकास परिस्थिति अनुसार हुन्छ। तथ्यमा आधारित हुन्छ। तथ्यका आधारमा सत्य खोज्नु हो। सिद्धान्त ठिक भयो भने मात्र जनताले साथ दिन्छन् भन्ने मान्यता हाम्रो छ।‘ उनले सि चिनफिङ विचारधारालाई समयउन्मुख र व्यवहारिक दृष्टिकोण भएको पनि बताए।
दोश्रो, चिनियाँ राष्ट्रपति सीले उत्पादन शक्ति मार्फत् विकास गर्नुपर्ने विचार अगाडि बढाएका छन्।
‘आर्थिक विकासले नै सबै समस्याको समाधान गर्छ’,उनले भने,‘यसले विकासको असन्तुलित समस्या समाधान गरेको छ। विकासको गुणस्तर बढेको छ। जनताको जीवनस्तर बढेको छ।‘
उनले चीनले सन् २०३५ सम्ममा आधारभूत समाजवादमा आधारित आधुनिकिकरण गर्ने बताए। चीन सन् २०५० सम्म समाजवादी देश बन्ने लक्ष्य साथ अगाडि बढेको पनि उनले उल्लेख गरे।
तेश्रो, उनले आफ्नो देशको पार्टी जनतालाई सेवा दिन लागिपरेको ताओको दावी छ। ‘चिनियाँ जनताको हित गर्न पार्टी स्थापना भएको हो’, ताओले भने, ‘मार्क्सले कम्युनिष्ट पार्टी सर्वहाराको पार्टी हो भन्नुभएको थियो त्यसको मतलव जनतालाई सेवा दिने भन्नु हो।‘
उनका अनुसार, सी चिनफिङ विचारधाराले जनताको जीवनस्तर सुधारमा केन्द्रीत भएर विकास अगाडि बढाएको छ। फलस्वरुप चिनियाँ कम्युनिष्ट पार्टी शासनमा आएको ७० वर्षमा २५ करोड जनता गरिबीको रेखाबाट माथि आएको छ। अनि १ अर्ब ३० करोड मानिस स्वास्थ्य बीमा कार्यक्रममा आबद्ध भएको पनि उनले उल्लेख गरे।
चौथो, सी चिनफिङको विचारधारले पार्टीमा आत्मअनुशासन कायम गरेको छ।
‘यसमा चिनफिङ झन् कडा भएर प्रस्तुत हुनु भएको छ’, ताओले भने, ‘आत्मक्रान्ति, शुद्धता, राजनीतिक विचार निर्माण गर्न आदर्शवान बन्नुपर्छ। आत्मक्रान्ति उकास्दै छौँ।‘
पार्टीले आफ्नो तालिम र शिक्षा समेत त्यसरी नै अगाडि बढाएको जानकारी दिए।
‘सी विचारधाराबारे पहिलो चरणको सिकाइ हामीले अगाडि बढाएका छौँ,’ उनले भने, ‘यस्ता सिकाइ र तालिमले पार्टीका समस्या समाधान गर्दछ।‘
पाँचौँ व्याख्या भने सी विचारधाराले विश्व दृष्टिकोण कसरी राख्छ भन्ने हो। छिमेकीहरुसँग सौहार्दपूर्ण सम्बन्ध राख्ने र शान्तिपूर्ण विकास गर्ने पक्षमा चिन र चिनियाँ जनता रहेको उनले बताए। चीनको नेपालसँग घनिष्ठ सम्बन्ध रहेको बताए।
त्यस्तै उनले बेल्ट एण्ड रोड इनसिएटिभलाई विश्व दृष्टिकोणका रुपमा अर्थ्याए। नेपाल बेल्ट एण्ड रोड इनिसिएटिभमा रहेकोले भूरणनीतिक रुपमा पनि महत्वपूर्ण स्थानमा रहेको उनको भनाइ छ।
उनले सत्तारुढ नेपाल कम्युनिष्ट पार्टीको स्कुल विभागलाई सहयोग गर्ने वचन पनि दिएका छन्।
-1746009348.jpg)
