प्रधानमन्त्री एवम् नेकपा अध्यक्ष केपी शर्मा ओलीले गत शनिबार बालुवाटारमा सचिवालय बैठक बोलाएका थिए। ग्रान्डी अस्पतालमा उपचार गराएर आएपछि उनको त्यो पहिलो राजनीतिक बैठक थियो।
कात्तिक १२ र १३ गते प्रधानमन्त्री ओलीको दुई पटक मिर्गौलाको डायलासिस भएको थियो। १३ गते अस्पतालबाट फर्किएका प्रधानमन्त्री ओलीले १४ गते शुक्रबारमा बालुवाटारमै आराम गरे। त्यो दिन पनि उनले पार्टीका अर्का अध्यक्ष पुष्पकमल दाहाल 'प्रचण्ड', उपप्रधानमन्त्री ईश्वर पोखरेललगायतसँग भेट गरे। १६ गते शनिबार बसेको सचिवालय बैठकमा उनी डेढ घन्टा सहभागी भए। त्यही बैठकमा प्रधानमन्त्री आफैंले नियमित डायलासिस गर्नुपर्ने त्यसो नगरे मिर्गौला प्रत्यारोपण गर्नु पर्ने जानकारी गराएका थिए। शनिबार या आइताबार मिर्गौलाको डायलासिस गर्नु पर्ने उनको भनाइ थियो।
तर साताभरि प्रधानमन्त्री बालुवाटारमा व्यस्त भए। आइतबार अपरान्ह मन्त्रिपरिषद बैठक बोलाए। त्यही बैठकबाट सातै प्रदेशका प्रदेश प्रमुखलाई बर्खास्त गर्ने निर्णय भयो भने मेडिकल काउन्सिलमा डाक्टर भगवान कोइरालालाई अध्यक्ष नियुक्त गरियो। सोही मन्त्रिपरिषदले धर्मकान्त बास्कोटालाई त्रिभुवन विश्वविद्धालयको उपकुलपति बनायो। मन्त्रिपरिषद बैठक चलिरहेकै बेलामा प्रधानमन्त्री शिक्षण अस्पताल महाराजगन्ज गए। फोक्सोको एक्सरे गराएर फर्किए।
उपनिर्वाचनको उम्मेदवार तोक्न र प्रदेश प्रमुखको नियुक्तिबारे छलफल गर्न आइतबार साँझ सचिवालय बैठक बोलाए। सचिवालय बैठकले उपनिर्वाचनको उम्मेदवार तोके पनि प्रदेश प्रमुख सिफारिस गर्न सकेन। प्रदेश प्रमुखको सिफारिस हुन नसकेपछि सचिवालय बैठक त्यही साँझ बस्ने भनिएको मन्त्रिपरिषद बैठक सोमबारका लागि सर्यो।
सोमाबार बिहान ११ बजे बसेको सचिवालय बैठकले प्रदेश प्रमुखको नाम टुंग्यायो। त्यसलगत्तै बसेको मन्त्रिपरिषद बैठकले ती नामलाई राष्ट्रपति कार्यालय पठायो।
मंगलबार राष्ट्रपति भवन शितल निवासमा भएको प्रदेश प्रमुखको सपथ समारोहमा प्रधानमन्त्री ओली सहभागी भए।
बुधबार, बिहिबार र शुक्रबार भने उनले औपचारिक राजनीतिक भेटघाट गरेनन्। यद्यपी पार्टीका शीर्ष नेतासँग भने छलफल जारी राखे। अर्का अध्यक्ष प्रचण्डसँग दैनिक जसो र कुनै दिन दुई पटकसम्म पनि भेट गरे। पार्टी महासचिव विष्णु पौडेलसँग पनि उनको नियमित भेटघाट भयो।
यही बीच शुक्रबार प्रधानमन्त्री ओलीले आफ्ना सचिवालयका सल्लाहकार र कर्मचारीलाई बोलाएर राजीनामा दिन निर्देशन दिएका छन्। स्रोतका अनुसार प्रधानमन्त्री ओलीले स्वकीय सचिव राजेश बज्राचार्यबाहेक सबैलाई राजीनामा दिन भनेका छन्। सोचेअनुसार काम नगरेको प्रधानमन्त्री ओलीको आरोप छ। आवश्यक परे फेरि नियुक्ति दिने समेत उनले बताएका छन्।
शनिबार प्रधानमन्त्री ओलीले कालापानीलाई भारतले आफ्नो नक्सामा राखेको विषयमा सर्वदलीय बैठक बोलाए।
अघिल्लो साता दुईदिन अस्पताल बसेका ओली गत आइतबार यता अस्पतालमात्र नगएकामात्र होइनन्, सक्रियता पनि बढाएका छन्। यो बीचमा उनले डायलासिस पनि गराएका छैनन्। तर उनलाई चिकित्सकले निगरानीमा भने राखेका छन्। राष्ट्रपति कार्यालय गएबाहेक उनी यो साता बालुवाटारबाट बाहिरिएका छैनन्।
चिकित्सकले प्रधानमन्त्रीलाई नियमित डायलासिस पहिलो विकल्प र मिर्गौला प्रत्यारोपण दोश्रो विकल्प भनेर सुझाव दिएका छन्। श्रोतका अनुसार प्रधानमन्त्रीलाई आवश्यक परेका बेलामा भने डायलासिस गर्नुपर्छ।