प्रमुख प्रतिपक्षी नेपाली कांग्रेसले उपप्रधानमन्त्रीसमेत रहेका रक्षामन्त्री ईश्वर पोखरेलले नेपाल ट्रष्टको तर्फबाट जारी गरेको श्वेतपत्रमा प्रश्न उठाएको छ।
मंगलबार ट्रष्टको तर्फबाट श्वेतपत्र जारी गरेका पोखरेलले दरबारमार्ग र ताहाचलको जग्गा यती होल्डिङलाई लिजमा दिँदा क्रमश: पुष्पकमल दाहाल ‘प्रचण्ड’ र शेरबहादुर देउवा प्रधानमन्त्री रहेको उल्लेख गरेका थिए।
कांग्रेस प्रवक्ता विश्वप्रकाश शर्माले सञ्चारमन्त्री गोकुलप्रसाद बाँस्कोटा मुछिएको सेक्युरिटी प्रिन्टिङ प्रेस खरिदमा कमिसन मोलमोलाइ दाबी गरिएको अडिओटेप र त्यसपछि उत्पन्न अवस्थालाई अन्यत्र मोड्न श्वेतपत्र जारी गरिएको उल्लेख गर्दै ट्वीट गरेका हुन्।
‘धर्मपुत्रको `७० करोड´ बाट ध्यान मोड्ने प्रयत्न, अर्थात् नेपाल ट्रष्टको श्वेतपत्र!,’ शर्माले गरेको ट्वीटमा भनिएको छ, ‘श्वेतपत्रको `शास्त्र´ पालना नगरी निर्माण गरिएको दुब्लो अस्त्र l कुनै नाम जानेर छोड्ने कुनै हिसाब गरेर जोड्नेl’
जसमाथि ट्रष्टको समयावधि सकिनुअघि नै लिज अवधि थप गरेको आरोप लागेको छ उसैले श्वेतपत्र जारी गरेको भन्दै शर्माले भनेका छन्, ‘गोकर्णको मुद्दा जो समेत माथि, जारी उहाँबाटैl आफ्नो शिरमा मुद्दा आफैं न्यायाधीश?’