कोरोनाभाइरसको संक्रमण रोकथामका लागि भन्दै सरकारले लकडाउनको घोषणा गरेपछि बजार पसल बन्द भएका छन्।
गृह मन्त्रालयले अत्यावश्यकीय वस्तुको कारोबार गर्ने पसल खोल्न आदेश दिए पनि त्यहाँ देखिनसक्ने भीडले फेरि संक्रमणको जोखिम बढाउन सक्ने खतरा उत्पन्न हुने अवस्था आएको छ।
नागरिकलाई घरबाहिर ननिस्किन आह्वान गरेको सरकारले दैनिक उपभोग्य वस्तुको आपूर्तिका लागि काठमाडौंमा विशेष व्यवस्था गर्ने भएको छ।
दैनिक उपभोग्य खाद्य वस्तुहरूको आपूर्ति व्यवस्थालाई सहज बनाउनको लागि गृह सचिव महेश्वर न्यौपाने अध्यक्षतामा आज बसेको बैठकले काठमाडौंमा रहेका दैनिक उपभोग्य वस्तुका विक्रेता तथा स्टोरलाई अनलाइन तथा फोनबाट अर्डर लिन र भ्यानबाट डेलिभरी गर्ने व्यवस्था मिलाउन निर्देशन दिएको छ।
पसल तथा स्टोर खोल्ने र त्यहाँ सामान्य अवस्थाको जस्तै खरिदविक्री हुँदा भीड हुने भएकाले उपभोक्ताको माग लिने, त्यसका लागि पैसा नलाग्ने फोनको व्यवस्था गर्ने र त्यसको प्रचारप्रसार गर्ने सचिवस्तरीय निर्णय भएको छ।
उपभोक्ताले आफ्नो मागअनुसार र स्टोर आफैंले पनि सम्भावित वस्तुको कम्बो प्याक बनाएर विक्री गर्ने व्यवस्था मिलाउनुपर्ने मन्त्रालयले निर्णय गरेको छ।
आपूर्तिको व्यवस्थापन गर्नका लागि सबै वडा कार्यालयबाट आवश्यक सहजीकरण गर्ने/गराउने व्यवस्था काठमाडौं महानगरपालिका र सम्बन्धित उपमहानगरपालिका/नगरपालिकाहरूले मिलाउनुपर्ने छ।
पसलहरू सञ्चालन, माग संकलन र वितरण गर्ने कार्यमा सुरक्षाको व्यवस्था नेपाल प्रहरीले गर्ने छ भने जिल्ला प्रशासनले डेलिभरी भ्यान,स्टोर तथा पसलका सञ्चालकलाई पासको व्यवस्था मिलाउने छ।
कालोबजारी, कृत्रिम अभाव सिर्जना गर्ने, जम्माखोरी जस्ता काम गरी बजारमा आवश्यक उपभोग्य खाद्यवस्तुहरूको अभाव देखिएमा यस मन्त्रालयको कुनै पनि शुल्क नलाग्ने र २४ सै घण्टा उठ्ने पैसा नलाग्ने नम्बर ११४९ मा फोन गरी जानकारी दिन गृहमन्त्रालयले आह्वान गरेको छ।
