नेपाल एअरलाइन्सका थप दुई जना उडान कर्मचारीमा कोरोना भाइरसको संक्रमण देखिएको छ। एअरलाइन्सका प्रवक्ता अर्चना खड्काले थप दुई जना उडान कर्मचारीमा संक्रमण पुष्टि भएको जानकारी दिइन्।
सोमबार एअरलाइन्सकै तीन जना पाइलट र चार जना उडान कर्मचारीमा संक्रमण देखिएको थियो। बाँकी सात जनाको पुनः परीक्षण गरिएकोमा थप दुई जना कर्मचारीमा नतिजा पोजेटिभ आएको हो। पाँच जनाको भने नेगेटिभ आएको छ।
संक्रमित ९ जनालाई नै बलम्बुस्थित सशस्त्र प्रहरी अस्पतालमा भर्ना गरिएको छ।
एअरलाइन्सले आफ्ना पाइलटसहित उडान कर्मचारीलाई सोल्टी होटलमा क्वारेन्टिनमा राख्दै आएको छ। प्रवक्ता खड्काका अनुसार पाइलटसहित उडान कर्मचारीलाई चार वटा उडान सकिएपछि क्वारेन्टिनमा पिसिआर परीक्षण गर्ने गरिएको जनाइन्।
'हामीले पाइलटसहितको टोलीलाई चार वटा उडान सकिएपछि पिसिआर परीक्षण गर्छौं र नेगेटिभ आएपछि घर पठाउँछौं,' उनले भनिन्।
पाइलटसहित उडान कर्मचारीमा संक्रमण देखिएपछि उनीहरूलाई नियमित होटल पुर्याउने चालकहरूलाई पनि क्वारेन्टिनमा राखिएको छ। संक्रमितसँगको सम्पर्कमा पुगेको भन्दै गाडी चालकहरूलाई एउटा होटलमा राखिएको र पिसिआर परीक्षण गर्ने तयारी गरिएको खड्काले जनाकारी दिइन्।
यस्तै संक्रमितहरूको सम्पर्कमा आएका अन्य व्यक्तिको पनि ट्रेसिङ कार्य चलिरहेको उनले बताइन्। एअरलाइन्सले पाइलटसहित दैनिक ३५ देखि ४० जना कर्मचारीलाई सोल्टी होटलमा राख्दै आएको छ।
पछिल्लो समय सरकारले विदेशमा रहेका नेपालीहरूलाई स्वदेश ल्याउने भनेपछि एअरलाइन्सको नियमित चार्टर्ड उडान भइरहेको छ। यसअघि पनि हिमालयन एअरलाइन्सका एकजना पाइलटसहित दुई जनामा संक्रमण पुष्टि भएको थियो।
