राष्ट्रिय स्वतन्त्र पार्टीका सभापति रवि लामिछानेले भुटानी शरणार्थी प्रकरणमा संलग्न कोहीपनि उम्किन नहुने बताएका छन्।
प्रतिनिधि सभा बैठकमा बजेटको सिद्धान्त र प्राथमिकतामाथिको छलफलमा बोल्दै लामिछानेले भुटानी शरणार्थी प्रकरणमा तातेको ताप्के सेलाउँदै गइरहेको बताए।
‘ताप्केको बीँड तात्यो, तात्दै गरेको ताप्के सेलायो। ताप्के नसेलाओस्,’ लामिछानेले भने।
उनले सिंगो देश र अन्तर्राष्ट्रिय समूदायले भुटानी शरणार्थी प्रकरणमा कोहीपनि दोषी उम्किन नहुने बताए।
‘मिलिजुली एकअर्कालाई बचाउने काम नहोस्। हामी यसलाई अत्यन्त नजिकबाट नियालीरहेका छौं,’ उनले भने।
अर्थमन्त्रीले ल्याएको बजेटका प्राथमिकता र सिद्धान्त ‘गरिनेछ’ ले भरिएको कर्मकाण्डी दस्तावेज मात्रै रहेको पनि उनले बताए। ।
‘केही वाक्य र शब्दहरू हेरफेर गरिएको कर्मकान्डी दस्तावेज मात्रै रहेको हामीले बुझेका छौं, यसले मुलुकको अर्थतन्त्र सुधार गर्नेमा हामी विश्वस्त छैनौं,’ उनले भने।
