राष्ट्रिय स्वतन्त्र पार्टी (रास्वपा) का सांसद स्वर्णिम वाग्लेले छोटो समयमा ठूलो छलाङ मार्ने अभूतपूर्व पुँजी निर्माण गर्ने अवसर साँघुरिँदै गइरहेको बताएका छन्।
प्रतिनिधि सभाको आजको बैठकमा प्रि-बजेट छलफलमाथि बोल्दै सांसद वाग्लेले अर्थतन्त्रले लय गुमाएको बताए।
‘यस्तो समयमा हामीले आर्थिक वृद्धि र स्थिरताका कुरा गरिरहेकाछौं, जतिबेला अर्थतन्त्रले लय गुमाएको छ। ८ प्रतिशतको आर्थिक वृद्धि प्रक्षेपण भएको देशमा आज २ प्रतिशतभन्दा कममा हामी रूमलिरहेका छौं,’ उनले भने।
लयमा अर्थतन्त्र हुँदा मात्रै स्थिरताका कुरा गर्न सुहाउने उनले बताए।
‘संकटमा परेको, भड्खालोमा जाकिएको अर्थतन्त्रको कुरा गर्दा स्थिरता र स्थायित्व न्याय गर्दैन,’ उनले भने, ‘वित्तीय खाडलहरू छन्। हिजो साँझसम्म ७ सय ३३ अर्बको राजश्व उठाउनुभयो, खर्च गर्नुभएको छ १ हजार १६ अर्ब। त्यत्रो खाडल कसरी पूरा गर्ने?’
उनले विगतमा नेपाली कांग्रेसको घोषणापत्र पनि आफूले धेरबहुत लेखिदिएको बताए।
‘नेपाली कांग्रेसको घोषणा पत्र पढ्नुभएको होला अर्थमन्त्रीले, मैले पनि पढेको छु। धेरबहुत मैले पनि लेखिदिएकै हो,’ वाग्लेले भने, ‘त्यहाँ आर्थिक सुधारका कुरा लेखिएका छन्। आफ्नै घोषणा पत्र पढेर त्यसलाई पनि कार्यान्वयनमा उतार्नुहोला।’
उनले हैरानी र झन्झटको दुष्चक्रबाट नेपाली अर्थतन्त्रलाई बाहिर ल्याउनुपर्ने पनि वाग्लेले बताए। ‘नीतिगत भ्रष्टाचार र आर्थिक कुशासनको विषय महत्वपूर्ण छ। त्यसको सम्बोधन होस् भन्ने चाहना छ,’ उनले भने, ‘अर्थमन्त्रीले थप उत्साह जगाउन सक्नुहोस्।’
भिडिओ:
