जनता समाजवादी पार्टी (जसपा) का सांसद प्रदीप यादवले नक्कली भुटानी शरणार्थी प्रकरणका आरोपी टोपबहादुर रायमाझी फरार हुनुले थप आशंका उब्जिएको बताएका छन्।
प्रतिनिधि सभाको शून्य समयमा बोल्दै जसपा सांसद यादवले एमाले सचिव रायमाझीलाई पक्राउ गर्न नसकेमा प्रहरीमाथि नै प्रश्न गर्ने ठाउँ रहने बताएका हुन्।
'उनी दोषी छैनन् भने प्रहरीबाट किन लुकेर बसेका छन्? लुक्नु भनेको यसमा कुनै न कुनै संलग्नता छ भन्ने हो। उनका छोरा पक्राउ पर्नुले यसले थप बल पुगेको अवस्था छ,' उनले भने, 'त्यसैले नेपाल प्रहरीले उनलाई नियन्त्रणमा लिएर छिटोभन्दा छिटो कानुनको दायरामा ल्याउनुपर्ने हुन्छ। टोपबहादुर नेपालमै रहेको र प्रहरीसँग सम्पर्कमा रहेको हल्ला चलेको छ।'
उनले टोपबहादुर रायमाझी पक्राउ परेपछि दोषी देखिएका जोसुकैलाई कारबाही गर्नुपर्ने बताए।
यो घटनाले अन्तर्राष्ट्रिय रूपमा नेपालको बदनाम हुने अवस्था आएको यादवले बताए।
