उच्चस्तरीय छानबिन समिति बनाउने रास्वपाको प्रस्तावमा कांग्रेसको समर्थन

महामन्त्री शर्मा भन्छन्- सँगै सहकारी ठगीबारे संसदीय छानबिन समिति पनि गठन हुनुपर्छ

सेतोपाटी संवाददाता

काठमाडौं, चैत २७

नेपाली कांग्रेसका महामन्त्री विश्वप्रकाश शर्माले २०४७ सालयता सार्वजनिक पद धारण गरेकाहरूको सम्पत्तिउपर उच्चस्तरीय समिति बनाएर छानबिन गर्ने माग उपयुक्त भएको बताएका छन्।

विभिन्न दलका नेताहरूले यसअघिदेखि नै यस्तो माग गर्दै आएका थिए।

राष्ट्रिय स्वतन्त्र पार्टी (रास्वपा) ले मंगलबार ०४७ यता सार्वजनिक पद धारण गरेकाहरूको सम्पत्ति छानबिन गर्न उच्चस्तरीय समिति गठनको प्रस्ताव अघि सारेको थियो।

यो प्रस्तावमा प्रमुख प्रतिपक्षी नेपाली कांग्रेसका महामन्त्री विश्वप्रकाश शर्मा सहमत देखिएका छन्।

महामन्त्री शर्माले सामाजिक सञ्जाल एक्समा प्रधानमन्त्री पुष्पकमल दाहाल 'प्रचण्ड' लाई सार्वजनिक अपिल गर्दै ०४७ यता सार्वजनिक पद धारण गरेका व्यक्तिहरूको सम्पत्ति छानबिन गर्न समिति गठनको माग उपयुक्त भएकोले गठन गर्न भनेका छन्।

सँगै महामन्त्री शर्माले सहकारी ठगीबारे संसदीय छानबिन समिति गठन पनि गर्नुपर्ने बताएका छन्।

‘सम्माननीय प्रधानमन्त्रीलाई सार्वजनिक अपिल, विगतदेखि हामी सबैले माग गर्दै आएको ०४७ यता सार्वजनिक पद धारण गर्नेको सम्पत्ति उपर उच्चस्तरीय समितिको माग रास्वपाले अहिले अघि सारेको छ, यो उपयुक्त छ। गठन गरौं,’ शर्माले भनेका छन्, ‘सहकारी ठगीबारे संसदीय छानबिन समिति गठन गरौं।’

कांग्रेसले सहकारी प्रकरणमा रास्वपा सभापतिसमेत रहेका उपप्रधान तथा गृहमन्त्री रवि लामिछाने जोडिएकोले संसदीय समिति गठन गरी निष्पक्ष रूपमा छानबिनको अडान राखिरहेको छ। मंगलबारको प्रतिनिधि सभा बैठकमा पनि कांग्रेसले संसदीय छानबिन समितिको माग गरेको थियो।

तर सत्तापक्ष तयार नभएपछि बैठकमा कांग्रेसले अवरोध गरेको थियो। १५ मिनेटका लागि स्थगित बैठक सूचना टाँसेर बुधबार बिहान ११ बजेसम्मका लागि स्थगित गरिएको छ।

यसबीचमा रास्वपा महामन्त्री डा. मुकुल ढकालले ०४७ यता सार्वजनिक पद धारण गरेकाको सम्पत्ति छानबिन गर्न उच्चस्तरीय समिति गठन गरिनुपर्ने र यसमा कांग्रेस सहमत हुनुपर्ने बताएका थिए। लगत्तै कांग्रेस महामन्त्री शर्माले उक्त माग उपयुक्त भएकोले गठन गर्न प्रधानमन्त्री दाहाललाई सार्वजनिक रूपमा अपिल गरेका छन्।

यो पनि:

०४७ सालयता सार्वजनिक पद धारण गरेकामाथि छानबिन गर्न उच्चस्तरीय समिति बनाऔं: रास्वपा

संसदीय छानबिन समिति गठन गर्नुपर्ने कां‌ग्रेसको अडान, सर्‍यो प्रतिनिधि सभा बैठक

संसदमा कांग्रेसको प्रश्न- रवि लामिछानेलाई कानून नलाग्ने, अनुसन्धान रोकिने?

सहकारीमा लाखौं बचतकर्ता ठगिएका छन्, न्याय दिलाउन हामी लाग्नुपर्छ: देउवा

सहकारी पीडितप्रति सरकार गैरजिम्मेवार भयो: कांग्रेस

बिनानिष्कर्ष सकियो बालुवाटारको छलफल

सभामुखले राखेको बैठकमा टसमस भएनन् सत्ता र प्रतिपक्ष (भिडिओ)

प्रकाशित मिति: मंगलबार, चैत २७, २०८० १५:१६

सिफारिस