प्रतिपक्षी दल नेपाली कांग्रेसका महामन्त्री गगनकुमार थापाले संसदीय छानबिन समिति गठन नगरे संसदको कामकारबाही अघि नबढ्ने चेतावनी दिएका छन्।
प्रतिनिधि सभाको बैठकमा उपप्रधान एवं गृहमन्त्री रवि लामिछानेले आफूमाथि सहकारी प्रकरणमा लागेका आरोपबारे प्रष्टीकरण दिएका छन्। त्यसपछि थापा संघीय संसद भवन नयाँ बानेश्वरको ल्होत्से हलमा आइतबार बेलुकी पत्रकार सम्मेलन गरेका हुन्।
पत्रकार सम्मेलनमा उनले सोमबार बिहान ११ बजेसम्म संसदीय छानबिन समिति गठन नभए संसदका कुनै काम कारबाही अघि नबढ्ने बताएका हुन्।
त्यस्तै संसदमा गृहमन्त्री लामिछानेले विभिन्न मुद्दाका विषयमा पनि प्रश्न गरेका थिए।
दोहोरो नागरिकता बोक्ने, देशको सूचना बेच्ने, बाख्रा पालनमा हिनामिना गर्ने, रातो पासपोर्ट लगायतका विषयमा संसदीय छानबिन समिति गठन गर्ने त भनेर प्रश्न गरेका हुन्।
त्यसबारे महामन्त्री थापाले पत्रकार सम्मेलनमा जवाफ दिएका हुन्।
‘हेर्नुस् त आज मलाई उहाँले के-के भन्नुभयो। म फेरि उहाँलाई अनुरोध गर्छु, लौ न तपाईंले एउटा छानबिन समिति बनाइदिनुस्। लौ न बनाइदिनुस्,’ उनले भने।
सर्वदलीय वा रास्वपाका मानिसहरू मात्रै राखेर भए पनि छानबिन समिति बनाउन उनले गृहमन्त्रीलाई आग्रह गरेका छन्।
‘गगन थापामाथि छानबिन गर्न रास्वपा पार्टीकै मात्र छानबिन समिति बनाइदिए पनि हुन्छ, लौ न बनाइदिनुस्,’ थापाले भने।
महामन्त्री थापाले गृहमन्त्री संसदीय छानबिन समितिबाट डराएको पनि बताए।
‘आफै गृहमन्त्री हुँदै गर्दा त्यसको ओझलाई नबुझिकन होइन, बुझेर तर यसलाई बहकाउने प्रयास गर्नुभएको छ। यो सबै कुराबाट के प्रमाणित हुन्छ भने उहाँ संसदीय छानबिन समिति गठनबाट डराउनुभएको छ,’ उनले भने।
पूरा भिडिओ:
-ink-1716128421.jpeg)
