नेकपा (माओवादी केन्द्र) का संसदीय दल नेतासमेत रहेका अध्यक्ष पुष्पकमल दाहाल 'प्रचण्ड' को नेतृत्वमा २०७९ पुस १० गते गठित सरकारमा पटक-पटक 'उथलपुथल' भएका छन्।
दाहाल सुरूमा नेकपा (एमाले), रास्वपा, राप्रपासहित दलहरूको समर्थनमा प्रधानमन्त्री नियुक्त भएका थिए। तर यो समीकरण धेरै टिक्न सकेन।
राष्ट्रपति निर्वाचनका मुखमा प्रधानमन्त्री दाहालले २०७९ फागुनमा समीकरण नै परिवर्तन गरे। प्रधानमन्त्री दाहालले एमालेलगायत दलको साथ छाडेर चुनावकै बेलाको नेपाली कांग्रेससहितको समीकरणबाट सरकारलाई निरन्तरता दिए।
यो समीकरण पनि धेरै लामो समय जान सकेन।
फागुन ७ देखि १० गतेसम्म गोदावरीमा चलेको कांग्रेस महासमिति बैठकले अबदेखि चुनावअघि गठबन्धन नगर्ने प्रस्ताव पारित गर्यो। यसपछि झस्केका दाहालले फागुन २१ मा एमालेसहित पहिलेकै समीकरणलाई साथमा लिएर सरकारलाई निरन्तरता दिए।
सरकारमा माओवादी, एमाले, रास्वपा, एकीकृत समाजवादी, जनता समाजवादी छन्। प्रधानमन्त्री दाहाललाई विश्वास मत दिएको जनमत र नाउपालाई पनि सरकारमा लैजाने तयारीमा दाहाल छन्।
नाउपा अध्यक्ष रञ्जिता श्रेष्ठले केही दिनअघि आफू पर्यटन मन्त्री बन्न लागेको बताएकी थिइन्। एमाले र माओवादीबाट संघीय सरकारमा सहभागी एक-एक मन्त्री फिर्ता बोलाएर नाउपा र जनमतलाई एक-एक मन्त्री दिएर सरकारमा सहभागी गराउने तयारीमा प्रधानमन्त्री दाहाल रहेका छन्।
पछिल्लो पटक बनेको समीकरणबाट मन्त्री भएकाहरूले कार्यभार सम्हालेको १०० दिन पुगेका अवसरमा उपलब्धिहरू सार्वजनिक पनि गरेका छन्। रक्षा मन्त्री हरि उप्रेती, गृहमन्त्री रवि लामिछाने, खेलकुद मन्त्री विराजभक्त श्रेष्ठ, श्रम मन्त्री डिपी अर्याललगायतले उपलब्धि सार्वजनिक गरेका थिए।
पछिल्लो समीकरणबाट बनेको सरकारका १०० दिने उपलब्धिबारे प्रधानमन्त्री दाहाल के भन्छन् त?
चितवनको भरतपुर विमानस्थलमा सोमबार बिहान पत्रकारहरूसँग कुराकानी गर्दै प्रधानमन्त्री दाहालले सरकारका कामकारबाही समग्रमा सन्तोषजनक र राम्रो नै रहेको बताए।
नयाँ गठबन्धन भएपछिको १०० दिनको उपलब्धि कस्तो रह्यो भन्ने पत्रकारको प्रश्नमा जबाफ दिएका प्रधानमन्त्री दाहालले भने, ‘समग्रमा सन्तोषजनक र राम्रो नै छ।’
उनले जनता र राष्ट्रका पक्षमा नीति तथा कार्यक्रम र बजेट प्रस्तुत भएको पनि बताए। ‘मलाई लाग्छ बजेट राम्रोसँग प्रतिनिधि सभाबाट पारित पनि हुन्छ,’ उनले भने।
सुशासन, सामाजिक न्याय र समृद्धिका क्षेत्रमा पनि थुप्रै सकारात्मक पहलहरू अघि आएकोले सन्तोषजनक रहेको उनले बताए।
‘राष्ट्र र जनताको अपेक्षाअनुसार अझै गति दिन आवश्यक छ,’ उनले भने।
उनले अहिलेको समीकरण राम्रैसँग अगाडि जाने पनि बताएका छन्। उथलपुथल गर्ने बेला नभएको पनि उनको भनाइ थियो।
बजेटबारे सत्ताघटक एमाले अध्यक्ष ओलीले असन्तुष्टि जनाइरहेका छन्।
भिडिओ:
यसबारे प्रधानमन्त्री दाहालले भने, ‘बजेटमा उहाँले असन्तुष्टिजस्तो मात्रै गर्नु भएको छ, साँच्चै गर्नुभएको छैन।’
रास्वपाका नेताहरूले राजीनामा गोजीमा राखेकोबारे दिएका अभिव्यक्तिबारे जबाफ दिएका प्रधानमन्त्री दाहालले भने, ‘रविजीले नै भन्नुहुन्थ्यो हामी त्यस्ता हौं भनेर। त्योचाहिँ आफ्नो पहिचानका निम्ति पनि उहाँहरूलाई भन्नुपर्ने होला। तर मैले बुझेसम्म त्यस्तो केही छैन।’
फरक प्रसंगमा उनले तीनवटै सुरक्षा प्रमुखहरूसँग आफूले केही दिनअघि छलफल गरेको र केही परिवर्तन नहुने भएकोले ढुक्कसँग काम गर्न भनेको पनि बताए।
यो पनि:
गोजीमा राजीनामा पत्र बोक्नु रास्वपाको पहिचान हो, सरकारबाट बाहिरिँदैन: प्रधानमन्त्री
केपी ओलीले सरकारको विरोध गरेजस्तो मात्रै गर्नुभएको हो: प्रचण्ड
तीनवटै आइजिपीलाई प्रधानमन्त्री दाहालले भने- केही परिवर्तन हुँदैन, ढुक्कसँग काम गर्नुस्
