नेपाली कांग्रेसले सरकारले सदनमा पेस गरेका अध्यादेशहरू स्वीकृत हुने बताएको छ।
प्रतिनिधि सभा र राष्ट्रिय सभाको बिहीबारको बैठकमा अध्यादेश निर्णयार्थ पेस गर्ने तयारी छ।
त्यसअघि जसपा नेपालका अध्यक्ष उपेन्द्र यादवले नेपाली कांग्रेसका सभापति शेरबहादुर देउवा र प्रधानमन्त्री केपी शर्मा ओलीसँग भेटेर कुराकानी गरेका थिए।
सभापति देउवा, महामन्त्रीद्वय गगन थापा र विश्वप्रकाश शर्मा तथा गृहमन्त्री रमेश लेखकसँग जसपा अध्यक्ष यादवले संघीय संसद भवन नयाँ बानेश्वरमा बिहीबार भेटेका थिए। यसपछि उनी प्रधानमन्त्रीलाई भेट्न बालुवाटार गएका थिए।
कांग्रेस सभापति र प्रधानमन्त्रीलाई भेटेर यादव जसपा नेपालको संसदीय दल बैठकमा सहभागी भएका थिए।
जसपा अध्यक्ष यादव र सभापति देउवाबीचका भेटका सन्दर्भमा जानकारी दिँदै कांग्रेस प्रमुख सचेतक श्याम घिमिरेले जसपा नेपालको पनि समर्थनमा अध्यादेश स्वीकृत हुने बताए।
प्रतिनिधि सभामा कांग्रेस र एमालेमात्रैको पनि बहुमत छ त राष्ट्रिय सभामा सत्तापक्षलाई बहुमत पुर्याउन ३ सांसद भएको जसपा नेपालको साथ चाहिन्छ।
‘जसपा नेपाल अहिले पनि सरकारलाई सहयोग गरिरहेको छ। उहाँहरू अध्यादेश पारित गर्न सकारात्मक हुनुहुन्छ,’ उनले भने, ‘अध्यादेशको विषयलाई लिएर विरोध गर्नुपर्ने कुनै कारण छैन।’
